AQShning Harper’s Bazaar nashri 2020-yilda turistlarga sayohat qilish tavsiya qilinadigan 20 ta eng yaxshi yo‘nalish ro‘yxatini taqdim qildi. Bu haqda Turizmni rivojlantirish davlat qo‘mitasi Axborot xizmati xabar bergan.
Amerika nashrida jumladan, shunday deyiladi: “Sayyoramizda bizni hayratga soluvchi Eyfel minorasi, Sidney opera teatri va Misr ehromlari kabi bir nechta sun’iy inshootlar mavjud. Ular bizni maftunkorligi, ko‘hnaligi bilan o‘ziga chorlaydi va o‘sha tomonlarga borishga intilamiz. Mana shu yodgorliklar qatoriga yana bir mo‘jiza — Samarqand markaziy maydonida joylashgan uch binodan iborat murakkab naqshlar bilan bezatilgan moviy gumbazli Registon maydonini qo‘shish vaqti keldi”.
Shuningdek, nashrda O‘zbekistonda yangi infratuzilmalar barpo etilib, butik-otellar paydo bo‘lgani, restoranlar esa Markaziy Osiyo taomlarini xush ko‘ruvchi mijozlarga xizmat ko‘rsatishi haqida ham ma’lumot berilgan.
Harper’s Bazaar nashri barchani O‘zbekistonga sayohat qilishga chorlab, Samarqand, Buxoro, Xiva hamda Farg‘ona vodiysidagi turistik maskanlarga alohida urg‘u berib o‘tgan.
“Farg‘ona vodiysi nafaqat dunyodagi eng yaxshi kulolchilik buyumlari bilan, balki serviqor tog‘lar bilan o‘ralgan go‘zal manzaralari bilan ham tarovatli”, — deyiladi nashrdagi maqolada.
Mavzuga doir:
Izoh (0)