Бекободда боғча мудирасини ишдан бўшатиш мақсадида болаларни заҳарламоқчи бўлган аёлларнинг аудиоёзуви тарқалгани ва бу ҳолат бўйича текширув бошлангани ҳақида хабар берилган эди.
Тошкент вилояти ИИББ мазкур аудиоёзувдаги иштирокчилардан бири билан суҳбат ўтказди.
Маълум қилинишича, ушбу аудиёзувда Бекобод туманидаги «Гулноза файз омад» фермер хўжалиги раҳбари С.К. ва Бекобод тумани Мактабгача таълим бошқармасида муқаддам ҳисобчи бўлиб ишлаган Ф.С.нинг суҳбати акс этган.
Мазкур ҳолат юзасидан туман прокуратурасига мурожаат қилган С.К.нинг сўзларига кўра, у 2019 йилнинг декабрь ойида ўз жиянини болалар боғчасига қайта ишга тиклаш ишлари билан юрган вақтда Ф.С. билан танишган. Ф.С. боғча мудирасидан ва бошқарма бошлиғидан норози эканлигини, ноҳақ ишдан бўшатилганлигини айтган. С.К. ҳам, ўз навбатида, шундай муаммога дуч келганлигини маълум қилган.
С.К.нинг сўзларига кўра, Ф.С. унинг телефон рақамини олган ва икки кундан кейин унга телефон қилиб, боғча болаларини заҳарлаб, раҳбарларнинг ишдан бўшатилишига эришиш ва шу орқали ўз мақсадларига эришиш режасини маълум қилган.
Аёлнинг айтишича, у Ф.С.нинг мазкур режасидан довдираб қолган, чунки Ф.С. айтган боғчада унинг набиралари ҳам тарбияланаётган эди. Шу сабабли у Ф.С.нинг сўзларини бўлмасдан охиригача эшитган ва уни ўз телефонига ёзиб олган. Суҳбатдан сўнг С.К. бу аудиоёзувни туман ҳокимилигига олиб борган.
С.К.нинг қайд этишича, унинг Ф.С. томонидан берилган таклифга рози бўлишига сабаб айнан ана шу боғчага унинг набиралари ҳам бориши сабаб бўлган. Яъни С.К. Ф.С.нинг таклифига рози бўлиши орқали у мазкур режа бошқа кишилар ёрдамида амалга оширилишининг олдини олишга уринган.
Изоҳ (0)