Andijonlik blogerning advokati: “Sudda protsessual qoidabuzarliklar juda ko‘p bo‘ldi”

Andijon viloyat ma’muriy sudi kassatsiya instansiyasining 4-yanvar kuni bo‘lib o‘tgan ochiq sud majlisida fuqaro Abdufatto Nuritdinov (bloger Otabek Nuritdinov)ga nisbatan chiqarilgan 15 sutka ma’muriy qamoq jazosi o‘zgarishsiz qoldirilgani haqida avval xabar berilgan edi.

Oliy sud matbuot xizmatidan ma’lum qilishlaricha, sud Abdufatto Nuritdinovning kassatsiya tartibida berilgan shikoyatini rad qilib, qanoatlantirilmasdan qoldirish va Andijon viloyat ma’muriy sudi tomonidan 30-dekabrdagi unga nisbatan chiqarilgan qarorni o‘zgarishsiz qoldirish haqida qaror qabul qilgan.

Sudyadan ma’muriy ishni butunlay,.. birinchi instansiya sudining chiqargan ma’muriy qarorini bekor qilib, ishni harakatdan tugatib, Abdufatto Nuritdinov ustidan ariza yozganlarga nisbatan qonuniy chora — tuhmat bilan ariza yozganligi uchun qonuniy chora ko‘rishni talab qildim. Buni asoslab ham berdim, mana, shuncha guvoh — sudya buni inobatga olmadi. Bu yerda protsessual qoidabuzarliklar juda ko‘p bo‘ldi.

Birinchidan, sud majlisi ochiq deb e’lon qilindi, ochiq deb e’lon qilinishi bilan sudya o‘zining kimligini, sud tarkibini tanishtirmay turib, videokamerani kiritish bo‘yicha iltimosnomaning muhokamasiga o‘tib ketdi. Undan so‘ng men o‘zim: “Ism-familiyangizni yozib qo‘yay”, deganimdan keyingina u o‘zining shaxsi to‘g‘risida ma’lumot berdi. Protsessual qoidabuzarliklar juda ko‘p, bu qonun bo‘yicha qabul qilingan sud qarorining bekor bo‘lishiga 100 foizlik asos bo‘ladi.

Keyingi harakatimiz — sud qarorini olganimizdan so‘ng, O‘zbekiston Oliy sudining Ma’muriy ishlar bo‘yicha sudlov hay’atiga nazorat tartibida shikoyat bildirish. Sud ajrimini qo‘limizga olishimiz bilan harakatni boshlaymiz.

Umidbek Davlatov, bloger Abdufatto Nuritdinovning advokati

Sud qaroriga ko‘ra, Abdufatto Nuritdinov Ma’muriy javobgarlik to‘g‘risidagi kodeksining 40-moddasi, 41-moddasi va 183-moddasida nazarda tutilgan huquqbuzarliklarni sodir etganlikda aybli deb topilib, unga Ma’muriy javobgarlik to‘g‘risidagi kodeksning 34-moddasi tartibida uzil-kesil o‘tash uchun 15 sutka ma‘muriy qamoq jazosi tayinlangan edi.