«Diyor24.uz» нашрида шу масала юзасидан 17 декабрь куни «Сайлов ва монополия» сарлавҳали материал эълон қилинган. Унда халқ депутатлари Термиз шаҳар Кенгаши депутати сайловини ўтказувчи 16-Турон округ сайлов комиссияси 260-сайлов участкасида Сайлов кодексининг 25-моддаси талаби бузилганлиги ҳақида сўз боради.
Қайд этилишича, халқ депутатлари Термиз шаҳар кенгаши депутатлигига номзоди кўрсатилган номзодларнинг бирининг мурожаати юзасидан журналистик текширув ўтказилган. Унинг номзоди 16-Турон сайлов округи бўйича Термиз шаҳар Кенгаши депутатлигига қўйилган.
Бироқ унга рақобатчи номзодлардан бири раҳбарлик қиладиган ташкилот ходимлари сайлов участка комиссиясини эгаллаб олган. 260-сайлов участкаси 8-сонли ўрта таълим мактаби биносида жойлашган бўлиб, участка сайлов комиссияси раиси З. Расулов, комиссия раиси ўринбосари С.Зоирова, котиби Д.Ҳасанова, аъзо Н.Раҳмонова ҳақиқатдан ҳам 8-сонли мактаб ўқитувчилари эканлиги аниқланган.
8-сонли мактаб директори Лапасова Ойнабод Абдумуротовнанинг номзоди ҳам айнан 16-Турон сайлов округи бўйича Термиз шаҳар кенгаши депутатлигига қўйилган.
Сайлов кодексининг «Сайлов комиссияси аъзоларига қўйиладиган талаблар» номли 25-моддаси 2-хатбошисида «… Бошқа сайлов комиссияларининг аъзолари, сиёсий партияларнинг аъзолари, вилоят, туман ва шаҳар ҳокимлари, прокуратура органларининг, судларнинг мансабдор шахслари, номзодларнинг яқин қариндошлари ва ишончли вакиллари, шунингдек, номзодларга бевосита бўйсунувчи шахслар сайлов комиссиясининг аъзоси бўлиши мумкин эмас», деб кўрсатилган.
Нашрнинг ёзишича, ушбу ҳолат юзасидан шу кунгача мутасадди ташкилотлар томонидан ҳеч қандай муносабат билдирилмади.
Мурожаат муаллифи эса сайлов жараёнида юқорида таъкидланган қонунбузарлик бартараф этилмагани, қўшимча равишда мазкур сайлов участка комиссияси таркибида шу округдан халқ депутатлари Термиз шаҳар кенгаши депутатлигига номзоди кўрсатилган «Турон» маҳалла фуқаролар фуқаролар йиғини раисига бевосита бўйсунувчи ходимлар ҳам фаолият юритганини маълум қилган.
«Юқоридаги ҳолатлар юзасидан ҳуқуқни муҳофаза қилувчи органлар, жумладан, Сурхондарё вилоят прокуратураси, Сурхондарё вилоят ИИБдан расмий муносабат кутиб қоламиз», — дейилади хабарда.
Изоҳ (0)