2019-yilning o‘tgan 11 oyida turli jinoyatlarni sodir etganligi uchun xalqaro qidiruvga berilgan 588 nafar shaxs xorijiy mamlakatlardagi hamkorlar bilan o‘tkazilgan tezkor tadbirlar davomida ushlandi. Ayni paytda esa yana 50 nafarga yaqin qidiruvdagi fuqarolarni O‘zbekistonga olib kelish bo‘yicha tegishli ishlar amalga oshirilmoqda. Bu haqda 26-dekabr kuni AOKAda bo‘lib o‘tgan brifingda ma’lum qilindi.
Tadbirda qatnashgan “Daryo” muxbiri Mirolim Isajonovning xabar berishicha, 2018—2019-yillarda Janubiy Koreya, Rossiya, Qozog‘iston, Ozarbayjon, Ukraina, Turkiya va boshqa davlatlarning huquqni muhofaza qiluvchi organlari tomonidan qidirilayotgan shaxslardan 27 nafari O‘zbekiston hududida aniqlanib, qo‘lga olingan va shu mamlakatlarga ekstraditsiya qilingan.
“Qidiruvdagi fuqarolarni qayerdaligini aniqlashga kirishishimizdan oldin u avval O‘zbekistondagi qaysi hududda yashagan bo‘lsa, o‘sha viloyat qidiruv vakillari shaxs haqida ma’lumot va taxminan qaysi davlatda ekanligi bo‘yicha xabar beradi. So‘ngra biz o‘sha mamlakat Interpol milliy markaziy byurosi orqali qidirishga tushamiz.
Agarda fuqaro haqiqatdan o‘sha davlatda topilsa, xalqaro talabga ko‘ra unga nisbatan bir oygacha qamoq ehtiyot chorasi qo‘llaniladi. Ikki davlat o‘rtasida ekstraditsiya qilish bo‘yicha shartnoma imzolangan bo‘lsa, bizning Bosh prokuratura shu shartnomaga asosan fuqaroni yurtimizga berishlarini so‘rab, mamlakat huquq tartibot organlariga iltimosnoma yuboradi. Ular ruxsati olingach, MDH davlatlariga fuqaro yashagan hudud qidiruv tashabbuskorlari uni olib kelish uchun jo‘natiladi. Masalan, xalqaro qidiruvga berilgan samarqandlik fuqaro Rossiyada ushlandi. Uni olib kelishga Samarqand viloyat qidiruv xodimlaridan iborat guruh tuzilib, yuboriladi. MDH mamlakatlaridan tashqari davlatlarda ushlangan fuqarolarni esa Interpol milliy markaziy byurosi xodimlari olib kelishadi.
Xorij davlatlariga borib kelish harajatlari Ichki ishlar vazirligi hisobidan sarflanadi. Vazirlikning tegishli buyrug‘iga asosan moliya boshqarmasi tomonidan kerakli mablag‘ ajratiladi”, — dedi Interpol Milliy markaziy byurosi bo‘lim boshlig‘i Olimxon Ergashev.
MMB rasmiysining aytishicha, xalqaro jinoyat politsiyasi — Interpol tashkiloti 1914-yilda tashkil etilgan. Uning doimiy ijro organi bo‘lgan bosh kotibiyati Fransiyaning Leon shahrida joylashgan. Mazkur tashkilotga a’zo mamlakatlar soni 194 ta bo‘lib, unga O‘zbekiston 1994-yili 176-davlat sifatida a’zolikka qabul qilingan.
Interpol tashkiloti nizomining 3-moddasiga ko‘ra, ushbu muasassa siyosiy, harbiy, diniy va irqiy harakterdagi faoliyat bilan shug‘ullanmaydi va aralashmaydi. Uning maqsadi umumjinoyatchilikka qarshi kurash va oldini olishdir. A’zo mamlakatlardagi Interpol milliy markaziy byurolari orqali jinoyatchilikka qarshi kurashuvchi har qanday huquqni himoya qiluvchi organlar bilan hamkorlikda ish yuritadi.
Izoh (0)