Mamlakatimiz asta-sekinlik bilan xalqaro moliyaviy maydonida o‘z o‘rnini egallab kelmoqda. Bunga qator xalqaro agentliklar tomonidan unga “barqaror” reytingining berilishi, vatanimiz tarixidagi ilk yevrobondlarning joylashtirilishi yoki fond bozorining rivojlantirilishiga alohida e’tibor qaratilishi buning yaqqol isbotidir. Misol uchun Moody’s “B1” — mamlakatimiz o‘z moliyaviy majburiyatlarini bajara olishini tasdiqlagan bo‘lsa, Standard & Poor’s Global tomonidan ham barqaror bashoratli “BB-/B“ reytingi tasdiqlandi. O‘zbekistonning xalqaro iqtisodiy hamjamiyat orasida ijobiy obrazga ega bo‘lishi, moliya bozori ishtirokchilarining yuqori e’tibori bilan bir qatorda ma’lum ma’suliyat ham yuklashi turgan gap.
Reyting agentliklari uchun davlatning iqtisodiy qudrati, moliyaviy kuchi yoki riskli holatlar asosiy bo‘lsa-da, sarmoya kiritishni rejalashtirgan kompaniyalar yoki O‘zbekiston bozoriga kirayotgan xalqaro brendlar hudud infratuzilmasini ham inobatga oladilar.
Bu borada Tashkent City Xalqaro Ishbilarmonlik Markazi har tomonlama talablarga mos imkoniyatlarni taklif qilmoqda. Yaratilayotgan zamonaviy moliyaviy markazdagi 4 ta ko‘p qavatli binoda O‘zbeksitonning ilg‘or banklari, yetakchi xalqaro moliya va investitsiya tashkilotlari hamda boshqa yirik kompaniyalar joylashishi ko‘zda tutilgan.
Hozirgi paytga kelib, Tashkent City moliyaviy markazi, ya’ni 6-Lotda qurilish ishlari qizg‘in davom etmoqda. Svayalarni qoqish deyarli yakuniga yetib ulgurgan. Aloqa, Asaka va Sanoat Qurilish banklari binolarini qurayotgan Shanghai Construction mutaxassislarining fikriga ko‘ra to‘liq bitirilishi 2021-yilga mo‘ljallangan moliyaviy markaz hududini umumiy yer-osti avtomobil turar joyi, hamda oynali fasadlarning uyg‘unligi birlashtirib turadi. Ammo, har bir bino o‘zining noyob konsepsiyasiga ega bo‘lib, u nafaqat investitsiyalar va foiz stavkalariga sho‘ng‘igan mutaxassisgagina qiziq bo‘lib qolmay, estetik jihatdan zavq ham taklif eta oladi.
Xususan, binolar konsepsiyalari tegishli kompaniyalar ichki madaniyatini aks etgan xolda, milliy madaniyat va milliy san’at g‘oyalarini ham o‘z ichiga oladi. Moliyaviy hisob-kitoblargaxos aniqlik va qat’iylik binolarning arxitekturaviy shakllarida aks ettirilsa-da, ular detallardagi Sharqona ohanglar bilan to‘iq hamnafas. Misol uchun Sanoat qurilish banki binosi mustaxkamlik, doimiy yangi marralar sari intilish timsoli. Asaka bank esa milliy madaniyatimizga qiyoslangan. Ijod va san’at bo‘lsa Aloqabank binosida o‘z aksini topgan.
Ushbu binolarda birinchi navbatda asosiy investorlar – bank muassasalarining bosh idoralari xamda biznes markaz joylashadi. Bu maqsad uchun binolarning quyi qismlari ajratilgan. 26 qavatli Aloqabank binosida 7 qavat bank ehtiyojlariga, 9 – 25 qavatlarni ijaraga topshirish mo‘ljallangan. Sanoat Qurilish Banki binosida esa umumiy 33 qavatning boshlang‘ich 11 ta qavatiga bank egalik qilib, 13 – 32 qavatlar ijaraga topshiriladi. Asaka bank binosidagi 26 qavat pastki qavatlarida bank va 11 – 24 qavatlar ijaraga beriladi. Shu bilan birga 3 ta binoda ham 2 tadan qavat texnik maqsadlar uchun ajratilgan.
Osmono‘par inshootlarda faoliyat olib boruvchi xodimlar xamda tashrif buyuruvchilarga qo‘shimcha qulayliklar taqdim etish uchun restoran va kafe kabi umumiy ovqatlanish joylari, ko‘p funksiyali hududlar va yuqori qavatlarda joylashgan kuzatuv maydonlari mavjud.
Omma tomonidan allaqachon mashhur Uoll Stritga qiyoslanayotgan moliyaviy markaz O‘zbekistonning jahon iqtisodiyotidagi o‘rnini yanada mustahkamlashi, dunyo moliya sohasi yetakchilari va O‘zbekistonning kompaniyalari o‘rtasidagi hamkorlikni yangi bosqichga olib chiqishi, albatta yurtimizdagi ishbilarmonlik muhitini faollashtirishi rejalashtirilgan.
Reklama huquqi asosida.
Izoh (0)