O‘zbekistondagi 2 mingdan ortiq tibbiyot muassasasining moddiy-texnik bazasi o‘ta nochor

Bosh prokuror Nig‘matilla Yo‘ldoshev Korrupsiyaga qarshi kurashish bo‘yicha Respublika idoralararo komissiyasining 25-dekabr, chorshanba kuni bo‘lib o‘tgan kengaytirilgan yig‘ilishida O‘zbekistondagi yuzlab tibbiyot muassasalari ta’mir va jihozlarga muhtoj ekanini ma’lum qildi.

Bugungi kunda 2 245 ta tibbiyot muassasasi moddiy-texnika bazasi o‘ta nochor bo‘lib, yangi binolar qurish, mavjudlarini rekonstruksiya qilish va kapital ta’mirlashni talab etadi.

Bundan tashqari, respublikadagi tibbiyot muassasalarida 67,8 million dollar miqdoridagi 4 697 ta tibbiy jihozga ehtiyoj mavjud.

Bunday ehtiyoj barcha hududlarda bor, ayniqsa, Surxondaryo (5,6 million dollar), Farg‘ona (6,6 million), Buxoro (8,2 million), Samarqand (9,1 million) viloyatlari va Qoraqalpog‘iston (7,2 million) Respublikasidagi ahvol alohida e’tiborni talab etadi.

Nig‘matilla Yo‘ldoshev, bosh prokuror