Joriy yil 14-maydagi “Oliy ta’lim muassasalariga test sinovlari orqali qabul qilish tizimini takomillashtirish bo‘yicha qo‘shimcha chora-tadbirlar to‘g‘risida”gi Prezident qarorida test sinovi topshiriladigan fanlar majmuasini ikki bo‘limga ajratib, birinchi bo‘limga barcha test topshiruvchilar uchun majburiy uchta fan — ona tili (o‘zbek, rus, qoraqalpoq tili), matematika va O‘zbekiston tarixi, ikkinchi bo‘limga abituriyent tanlagan bakalavriat ta’lim yo‘nalishiga mos ikkita fan kiritilishi nazarda tutilgan. Bu haqda O‘zA eslatmoqda.
Shu bois 2020/2021-o‘quv yili qabulidan boshlab ayni loyiha amaliyotga tatbiq etiladi.
Majburiy fanlar bo‘limidagi test topshiriqlari uchun 2,1 balldan (jami 94,5), ta’lim yo‘nalishiga mos fanlar bo‘limidagi test topshiriqlari uchun 3,1 balldan (jami 186) berilishi nazarda tutilmoqda. Bunda abituriyent to‘plashi mumkin bo‘lgan umumiy ball 280,5 ni tashkil qiladi.
Davlat test markazidan olingan ma’lumotlarga ko‘ra, test tizimiga bunday o‘zgartish kiritilishida xorijiy davlatlar tajribasi o‘rganilgan. Imkon qadar milliy ta’lim tizimiga mos bo‘lgan va ta’limning rivojlanishiga hissa qo‘sha oladigan jihatlarni olishga e’tibor qaratilgan. O‘tgan 2017—2019-o‘quv yillarida DTM xodimlari Yaponiya, Janubiy Koreya, Turkiya, Rossiya, Qozog‘iston kabi bir qancha davlatlarda bo‘lib, ularning oliy o‘quv yurtlariga qabul qilish tizimini o‘rganib chiqdi, tahlil qildi.
Ayrim xorijiy davlatlar tajribasida kirish imtihonlariga ona tili va matematika kiritilganiga guvoh bo‘lish mumkin. Yoki Turkiya kabi boshqa qator mamlakatlarda davlat tarixidan imtihon topshirish belgilab qo‘yilgan.
Oxirgi yillarda abituriyentlar orasida maqsadli kirish imtihonlariga tayyorlanganda, afsuski, faqat ikkita, hatto faqat birinchi blokdagi fanni yaxshi o‘zlashtirib, talaba bo‘lish mumkin, degan qarash yuzaga keldi. Ammo bu yangilikning joriy etilishi qanday samara berishini test o‘tgach, uning natijalari asosida belgilash mumkin.
Asosiy maqsad yoshlarning umumta’lim maktablarida o‘qitiladigan fanlarni teng ravishda o‘rganib borishiga erishishdir. O‘g‘il-qizlar umumta’lim maktabida belgilangan dasturni to‘la o‘rganib, har tomonlama rivojlangan bo‘lib maktabni bitirishi zarur. Mana shu hisobga olingan holda bitiruvchilarning OTMlarga kirish imtihonlariga majburiy fanlar bo‘limi qo‘shilgan.
Qo‘shimcha uchta fandan test o‘quv dasturlariga binoan, ancha sodda, abituriyentning umumiy savodxonligi, mantiqiy fikrlashi va tayanch bilimlarini baholashga yo‘naltirilgan, birinchi qiyinlik darajasida bo‘ladi.
Ma’lumotlarga ko‘ra, bloklarda bitta fan takrorlansa ham ularning qiyinlik darajasi bir-biridan farq qiladi. Majburiy blokdagi matematika fani savollari birinchi qiyinlik darajasida bo‘lsa, yo‘nalish fanlar blokidagi testlar esa ikkinchi va uchinchi murakkablik darajasidagi savollardan iborat bo‘ladi.
Kelgusi 2020/2021-o‘quv yilidan boshlab amaliyotga kiritiladigan bu o‘zgarishga Davlat test markazi tayyorgarlik ko‘rmoqda. Ayni shu yo‘nalishda ishlaydigan testologlar soni ko‘paytirilgan, topshiriqlar sinovdan o‘tkazilyapti.
Izoh (0)