AQSh Janubiy Koreyadan hamkorlikdagi harbiy xarajatlar uchun 5 mlrd dollar talab qilmaydigan bo‘ldi

AQSh Janubiy Koreya bilan harbiy xarajatlarni taqsimlash bo‘yicha muzokaralardagi pozitsiyasini qayta ko‘rib chiqib, uning to‘lov hissasini 5 baravar oshirish talabidan voz kechdi. Bu haqda “TASS” xabar bermoqda.

Tomonlar o‘z pozitsiyalarini yaqinlashtira boshladi va Janubiy Koreya uchun mamlakatda AQSh qo‘shinlarini saqlash uchun sarflanadigan to‘lovlar miqdorini biroz oshirish masalasi ko‘rib chiqilmoqda. Ikki mamlakat o‘rtasidagi yakuniy kelishuv 2020-yil fevral oyida tuzilishi mumkin.

Xabarda aytilishicha, Amerika tomon to‘lovlarni qariyb 5 milliard dollargacha oshirish talabi haddan ortiq degan qarorga keldi va endi ularni faqat 10-20 foizga oshirish, shuningdek, Janubiy Koreya tomonidan AQSh qurollarini sotib olish borasida gap ketmoqda.

AQSh hokimiyati tepasiga Donald Tramp kelganidan buyon Vashington Seuldan Koreya Respublikasidagi amerikalik harbiylarni saqlash uchun to‘lanadigan badalni oshirishni talab qila boshlagan.

Jumladan, Janubiy Koreyaga 2019-yilda hamkorlikdagi mudofaa uchun sarflanadigan xarajatlar 8,2 foizga oshirilib, 915 million dollarni tashkil etgan. Noyabr oyida esa Vashington bu mablag‘larni deyali 5 baravar — 4,7 milliard dollargacha oshirishni talab qilgan.

Tomonlar bir necha bosqichda muzokaralar o‘tkazgan, lekin ular hech qanday kelishuvsiz yakunlangan.