Andijon tumani hududida joylashgan “Yulduz” podstansiyasida 125 000 kVA quvvatli 2-kuch transfomatori 200 000 kVA quvvatli kuch transformatoriga almashtirilishi munosabati bilan Andijon viloyatining ayrim hududlarida 24—29-dekabr kunlari elektr ta’minotida uzilishlar bo‘lishi haqida xabar berilgan edi.
“O‘zbekiston milliy elektr tarmoqlari” kompaniyasidan ma’lum qilishlaricha, “Yulduz” podstansiyasida mavjud ikkita 125 000 kVA quvvatli avtotransformatorlarning biri 20—26-noyabr kunlari almashtirilgan, ikkinchisini almashtirish ishlari esa 24—29-dekabr kunlari emas, balki 2020-yilning yanvar oyida amalga oshirilishi rejalashtirilgan.
“Buning uchun zarur barcha jihoz va uskunalar shay holatga keltirilgan”, — deyiladi kompaniya axborotida. Qayd etishlaricha, “Yulduz” podstansiyasida olib borilayotgan modernizatsiya dasturiga oid amaliyotlar Farg‘ona vodiysi aholisini sifatli elektr energiyasi bilan uzluksiz ta’minlashga xizmat qilishi nazarda tutilgan.
Ijtimoiy tarmoqlardagi Andijon viloyati yangiliklarini yoritib boruvchi ommabop kanallarda: “Parlament saylovlari yakunlangach, Andijonda elektr energiyasida uzilishlar bo‘lishi xabar qilinmoqda” qabilidagi xabarlar tarqalgan, bunga “Yulduz” podstansiyasida amalga oshirilishi ko‘zda tutilgan ishlar asos qilib ko‘rsatilgan edi.
Keyinroq o‘sha manbalarda: “Elektr energiyasi iste’molchilarining xohish va istaklarini inobatga olgan holda mazkur kuch transformatorini o‘rnatish va ta’mirlash ishlari Yangi yil bayrami munosabati bilan 2020-yil yanvar oyida bajarilishini ma’lum qilamiz”, degan mazmunda raddiya berildi.
O‘z navbatda, “O‘zbekiston milliy elektr tarmoqlari korxonasi” tarqatilgan ushbu xabarlarga shunday munosabat bildirgan:
“Turli nosozliklar tufayli elektr ta’minotida uzilishlar bo‘lib turishi tabiiy hol, bu haqda “Hududiy elektr tarmoqlari” kompaniyasi matbuot xizmati tomonidan har kuni rasmiy bayonotlar berib borilmoqda va bu kabi texnik masalalarni mamlakatdagi siyosiy tadbirlar bilan bog‘lash mutlaqo noto‘g‘ri”.
Izoh (0)