Farg‘onada YPX inspektoriga tegishli avtomashinani tosh bilan urib, pachoqlagan fuqaroga 14 sutka ma’muriy qamoq jazosi tayinlandi, deb xabar beradi “Postda”.
16-dekabr kuni soat 16:30 larda fuqaro S.V. mast holatda avtomobil boshqarib, Bag‘dod tumani Sho‘roqyer qishlog‘ida joylashgan maktab oldiga kelib to‘xtagan. Ortidan tuman IIB YPX inspektori ham yetib kelib, haydovchiga yo‘l harakati qoidalarini buzgani haqida ogohlantirgan.
YPX inspektori shu joyning o‘zida haydovchiga ma’muriy bayonnoma rasmiylashtirmoqchi bo‘lgan. Ammo haydovchi avtomobilni o‘zi boshqarmaganligini bahona qilib, maktab binosiga kirib ketgan. Avtomobil esa jarima maydoniga olib ketiladi. Maktabdan qaytib chiqqan S.V. avtomashinasi olib ketilganligidan jazavaga tushib, shu yerda turgan YPX inspektoriga tegishli avtomashinani tosh bilan urib pachoqlagan.
S.V. sudda o‘sha kuni mast holatda o‘zini boshqara olmaganligini, huquqbuzarlik harakatiga iqrorligini aytib ko‘rsatma bergan. Bag‘dod tumani ma’muriy sudi esa unga 14 sutka ma’muriy qamoq jazosi tayinladi.
Izoh (0)