Namanganda Shavkat Mirziyoyev topshirig‘idan so‘ng qayta ta’mirlangan axborot-kutubxona markazi foydalanishga topshirildi

Namangan shahrida Nodirabegim nomidagi axborot-kutubxona markazi foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.

Markaz bir vaqtning o‘zida 450 nafar kitobxonga xizmat ko‘rsata oladi. 573 ming kitob fondiga ega, ulardan 200 mingga yaqini badiiy asar, 5000 nomdagisi elektron kitoblar. Mingdan ortiq nodir kitoblar, 100 mingdan oshiq jurnal, katta adaddagi gazetalar saqlanmoqda.

Ochilish marosimida viloyat hokimi Xayrullo Bozorov, Prezident Adminstratsiyasi huzuridagi axborot va ommaviy kommunikatsiyalar agentligi direktori Komil Allamjonov so‘zga chiqdi.

— Davlat rahbari shu yil Namangan viloyatiga tashrifi chog‘ida viloyat kutubxona markazini zamon talablariga mos ravishda qayta ta’mirlash, kitob fondini boyitish, mutolaa uchun qulay sharoit yaratish bo‘yicha topshiriq bergan edi. Bugun ana shu topshiriq ijrosi yuzasidan Nodirabegim nomidagi axborot-kutubxona binosini mutlaqo yangi ko‘rinishda namanganlik kitobxonlar ixtiyoriga topshirilmoqda. Barcha sharoit va qulayliklarga ega ushbu kutubxona Namanganda kutubxonachilikning 100 yilligi va Yangi yil bayramiga munosib tuhfa bo‘ladi, — dedi Komil Allamjonov.

Rekonstruksiyadan so‘ng zamonaviy ko‘rinishga ega bo‘lgan binoda Bookcafe, yangi adabiyotlar ko‘rgazmalar zali, media va internet zali, xorijiy yozuvchilar asarlarini o‘qib-o‘rganish uchun do‘stlik o‘quv zali, shuningdek, O‘zbekiston, yoshlar va ilmiy zallar mavjud. Bu yerda masofadan turib kitob o‘qish uchun imkoniyat yaratilgan. Hududda yuqori tezlikdagi internetga ega bo‘lgan WI-FI zonasi mavjud.

O‘quv markazi hamda bolalar zali bejirim jihozlangan. Nodirabegim zalida esa shoiraning hayoti va ijodi, u yashab o‘tgan davrdan hikoya qiluvchi eksponatlar joylashtirildi.

Markazni viloyat hokimligi yana 60 ming dona kitob bilan boyitdi. O‘zbekiston Milliy kutubxonasi tomonidan 50 million so‘mlik eng sara adabiyotlar sovg‘a qilindi.

Ma’lumot uchun, markaz rekonstruksiyasi va ta’mirlash ishlari uchun Axborot sohasi va ommaviy kommunikatsiyalarni rivojlantirishni qo‘llab-quvvatlash jamg‘armasi hamda O‘zbekiston yoshlar ittifoqi mablag‘lari hisobidan 10 milliard so‘m ajratildi. Viloyat hokimligi tomonidan 1,5 milliard so‘mga yaqin obodonlashtirish ishlari amalga oshirildi.

Tadbirda Axborot va ommaviy kommunikatsiyalar agentligi direktor o‘rinbosari Saida Mirziyoyeva ishtirok etdi.