Фарғонада ЙПХ инспекторига тегишли автомашинани тош билан уриб, пачоқлаган фуқарога 14 сутка маъмурий қамоқ жазоси тайинланди, деб хабар беради «Постда».
16 декабрь куни соат 16:30 ларда фуқаро С.В. маст ҳолатда автомобиль бошқариб, Бағдод тумани Шўроқер қишлоғида жойлашган мактаб олдига келиб тўхтаган. Ортидан туман ИИБ ЙПХ инспектори ҳам етиб келиб, ҳайдовчига йўл ҳаракати қоидаларини бузгани ҳақида огоҳлантирган.
ЙПХ инспектори шу жойнинг ўзида ҳайдовчига маъмурий баённома расмийлаштирмоқчи бўлган. Аммо ҳайдовчи автомобилни ўзи бошқармаганлигини баҳона қилиб, мактаб биносига кириб кетган. Автомобиль эса жарима майдонига олиб кетилади. Мактабдан қайтиб чиққан С.В. автомашинаси олиб кетилганлигидан жазавага тушиб, шу ерда турган ЙПХ инспекторига тегишли автомашинани тош билан уриб пачоқлаган.
С.В. судда ўша куни маст ҳолатда ўзини бошқара олмаганлигини, ҳуқуқбузарлик ҳаракатига иқрорлигини айтиб кўрсатма берган. Бағдод тумани маъмурий суди эса унга 14 сутка маъмурий қамоқ жазоси тайинлади.
Изоҳ (0)