Ўзбекистонда эски намунадаги ҳайдовчилик гувоҳномасини янгисига алмаштириш 2020 йилнинг 31 декабригача амалга оширилади. Бу ҳақда Давлат хизматлари агентлиги Тошкент шаҳар бошқармаси эслатди.
Вазирлар Маҳкамасининг 2017 йил 2 мартдаги «Миллий ҳайдовчилик гувоҳномасининг ҳамда автомототранспорт воситаси рўйхатдан ўтказилганлиги тўғрисидаги гувоҳноманинг янги намуналарини жорий этиш чора-тадбирлари тўғрисида»ги қарорига кўра, эски намунадаги ҳайдовчилик гувоҳномасини янги намунадаги миллий ҳайдовчилик гувоҳномасига алмаштиришнинг сўнгги муддати этиб 2020 йилнинг 31 декабри белгиланган.
Ҳайдовчилик гувоҳномаларини Давлат хизматлари марказлари орқали янги намунадагисига алмаштириш мумкин.
Миллий ҳайдовчилик гувоҳномаларини янги намунасига алмаштириш учун ҳайдовчилар паспорт ва эски намунадаги ҳайдовчилик гувоҳномаси ҳамда унинг талонини тақдим этиши керак бўлади.
Эски намунадаги миллий ҳайдовчилик гувоҳномалари ҳамда автомототранспорт воситаси рўйхатдан ўтказилганлиги тўғрисидаги гувоҳномалар 2021 йил 1 январдан бошлаб ҳақиқий эмас деб ҳисобланади.
Қайд этилишича, бугунги кунда Тошкент шаҳрининг Мирзо Улуғбек, Миробод, Учтепа, Шайхонтоҳур, Юнусобод, Яккасарой, Яшнобод туманидаги Давлат хизматлари марказлари орқали ушбу давлат хизмати амалга оширилмоқда.
Изоҳ (0)