Partiyalarning barchasi yaxshi saylovoldi dasturiga ega, eng muhimi — ular o‘z tashabbuslarini amalga oshira olishlarida; partiyalar parlamentga o‘z va’dalarini bajarish uchun kirishlari kerak. Bu fikr Toshkentdagi 882-saylov uchastkasiga tashrif buyurgan Yevropada xavfsizlik va hamkorlik tashkiloti (YeXHT) Parlament assambleyasi (PA) prezidenti Georgiy Sereteli tomonidan bildirilgan.
“Men xalqning saylovlardan umidlari katta ekanligini his qilayapman. Bu yangi parlament uchun ulkan mas’uliyat yuklaydi”, — deya Seretelining so‘zlaridan iqtibos keltirmoqda Axborot va ommaviy kommunikatsiyalar agentligi.
Oliy Majlis Qonunchilik palatasiga saylovlar kuzatuvchisi sifatida ilk bor O‘zbekistonga tashrif buyurgan Georgiy Sereteli YeXHT Demokratik institutlar va inson huquqlari bo‘yicha byurosi (DIIHB) missiyasining 250 nafardan ziyod qisqa muddatli va YeXHT PA kuzatuvchilari faoliyatini muvofiqlashtiradi.
Georgiy Seretelining so‘zlariga ko‘ra, bugungi saylovlar mamlakat uchun o‘ziga xos sinov bo‘lib, saylov jarayonining qonuniyligi ta’minlash, fuqarolarga haqqoniy, erkin va ongli tanlov qilish imkoniyatini yaratish juda muhim vazifadir.
“Biz partiya yetakchilari bilan uchrashdik, ularning barchasi yaxshi saylovoldi dasturiga ega. Eng muhimi — ular o‘z tashabbuslarini amalga oshira olishlarida. Partiyalar parlamentga o‘z va’dalarini bajarish uchun kirishlari kerak”, — dedi Georgiy Sereteli ommaviy axborot vositalari vakillari bilan uchrashuvda.
YeXHT PA prezidentining aytishicha, YeXHT yakuniy hisobotida nafaqat siyosiy muhit, shuningdek, saylov qonunchiligini tahlili, ovoz berish jarayoni va boshqa saylov tizimi bilan bog‘liq holatlar o‘z aksini topadi.
“Biz bugungi jarayonlar o‘zbek xalqining turmush tarziga ijobiy ta’sir qilishini xohlaymiz. Saylovlar ham aynan shu maqsadda o‘tkaziladi” — dedi Georgiy Sereteli.
YeXHT Parlament assambleyasi O‘zbekistondagi saylovlarda ilk bor qatnashmoqda. Delegatsiya tarkibiga assambleyaning 50 nafarga yaqin vakili, shu jumladan tashkilotga a’zo-davlatlarning parlamenti a’zolari va YeXHT PA xalqaro kotibiyati xodimlari kirgan.
Izoh (0)