Партияларнинг барчаси яхши сайловолди дастурига эга, энг муҳими — улар ўз ташаббусларини амалга ошира олишларида; партиялар парламентга ўз ваъдаларини бажариш учун киришлари керак. Бу фикр Тошкентдаги 882-сайлов участкасига ташриф буюрган Европада хавфсизлик ва ҳамкорлик ташкилоти (ЕХҲТ) Парламент ассамблеяси (ПА) президенти Георгий Церетели томонидан билдирилган.
«Мен халқнинг сайловлардан умидлари катта эканлигини ҳис қилаяпман. Бу янги парламент учун улкан масъулият юклайди», — дея Церетелининг сўзларидан иқтибос келтирмоқда Ахборот ва оммавий коммуникациялар агентлиги.
Олий Мажлис Қонунчилик палатасига сайловлар кузатувчиси сифатида илк бор Ўзбекистонга ташриф буюрган Георгий Церетели ЕХҲТ Демократик институтлар ва инсон ҳуқуқлари бўйича бюроси (ДИИҲБ) миссиясининг 250 нафардан зиёд қисқа муддатли ва ЕХҲТ ПА кузатувчилари фаолиятини мувофиқлаштиради.
Георгий Церетелининг сўзларига кўра, бугунги сайловлар мамлакат учун ўзига хос синов бўлиб, сайлов жараёнининг қонунийлиги таъминлаш, фуқароларга ҳаққоний, эркин ва онгли танлов қилиш имкониятини яратиш жуда муҳим вазифадир.
«Биз партия етакчилари билан учрашдик, уларнинг барчаси яхши сайловолди дастурига эга. Энг муҳими — улар ўз ташаббусларини амалга ошира олишларида. Партиялар парламентга ўз ваъдаларини бажариш учун киришлари керак», — деди Георгий Церетели оммавий ахборот воситалари вакиллари билан учрашувда.
ЕХҲТ ПА президентининг айтишича, ЕХҲТ якуний ҳисоботида нафақат сиёсий муҳит, шунингдек, сайлов қонунчилигини таҳлили, овоз бериш жараёни ва бошқа сайлов тизими билан боғлиқ ҳолатлар ўз аксини топади.
«Биз бугунги жараёнлар ўзбек халқининг турмуш тарзига ижобий таъсир қилишини хоҳлаймиз. Сайловлар ҳам айнан шу мақсадда ўтказилади» — деди Георгий Церетели.
ЕХҲТ Парламент ассамблеяси Ўзбекистондаги сайловларда илк бор қатнашмоқда. Делегация таркибига ассамблеянинг 50 нафарга яқин вакили, шу жумладан ташкилотга аъзо-давлатларнинг парламенти аъзолари ва ЕХҲТ ПА халқаро котибияти ходимлари кирган.
Изоҳ (0)