Majburiy ijro byurosi Qashqadaryo viloyati Koson tumanida joylashgan neft-gaz qazish ishlari bilan shug‘ullanuvchi korxonaning neft-gaz ishlab chiqaruvchi asosiy uskunasini qarzdorlik evaziga hatladi. Bu haqda “Daryo”ga MIB viloyat boshqarmasi axborot xizmati xabar bermoqda.
Ma’lum qilinishicha, “Koson neft-gaz qidiruv ekspeditsiyasi” MChJning soliqdan qarzdorligi 3,3 milliard so‘mga yetgan. Ammo muddat o‘tsa-da, qarzdorlik bartaraf etilmagan. Shu sababli Koson tumanlararo iqtisodiy sudining 2019-yil 9-dekabrdagi qaroriga asosan G‘uzor tumani Davlat soliq inspeksiyasi foydasiga ushbu pul miqdorini undirish haqida ijro hujjati chiqqan.
Qayd etilishicha, ushbu ijro hujjati Majburiy ijro byurosining Koson tuman bo‘limi ish yurituviga kelib tushgandan so‘ng joriy yilning 16-dekabr kuni bo‘lim xodimlari qarzdorlikni undirish maqsadida korxona joylashgan manzilga borib, qarzdorlik evaziga tashkilotning yotoqxona binosi hamda bahosi 3 milliard so‘m turuvchi “Uralmash” rusumli neft va gaz qazib oluvchi burg‘ulash uskunasini hatlab olgan.
Hozirda bu mol-mulklarni baholash choralari ko‘rilmoqda. Kelgusida qarzdor mavjud qarzdorlikni qoplamagan taqdirda, hatlangan mol-mulklarni sotish orqali qarzdorlikni qoplash choralari ko‘riladi.
Izoh (0)