Мажбурий ижро бюроси Қашқадарё вилояти Косон туманида жойлашган нефть-газ қазиш ишлари билан шуғулланувчи корхонанинг нефть-газ ишлаб чиқарувчи асосий ускунасини қарздорлик эвазига ҳатлади. Бу ҳақда «Дарё»га МИБ вилоят бошқармаси ахборот хизмати хабар бермоқда.
Маълум қилинишича, «Косон нефть-газ қидирув экспедицияси» МЧЖнинг солиқдан қарздорлиги 3,3 миллиард сўмга етган. Аммо муддат ўтса-да, қарздорлик бартараф этилмаган. Шу сабабли Косон туманлараро иқтисодий судининг 2019 йил 9 декабрдаги қарорига асосан Ғузор тумани Давлат солиқ инспекцияси фойдасига ушбу пул миқдорини ундириш ҳақида ижро ҳужжати чиққан.
Қайд этилишича, ушбу ижро ҳужжати Мажбурий ижро бюросининг Косон туман бўлими иш юритувига келиб тушгандан сўнг жорий йилнинг 16 декабрь куни бўлим ходимлари қарздорликни ундириш мақсадида корхона жойлашган манзилга бориб, қарздорлик эвазига ташкилотнинг ётоқхона биноси ҳамда баҳоси 3 миллиард сўм турувчи «Уралмаш» русумли нефть ва газ қазиб олувчи бурғулаш ускунасини ҳатлаб олган.
Ҳозирда бу мол-мулкларни баҳолаш чоралари кўрилмоқда. Келгусида қарздор мавжуд қарздорликни қопламаган тақдирда, ҳатланган мол-мулкларни сотиш орқали қарздорликни қоплаш чоралари кўрилади.
Изоҳ (0)