19-dekabr kuni O‘zbekiston tashqi ishlar vazirining birinchi o‘rinbosari Ilhom Ne’matov Toshkentga ishchi tashrif bilan kelgan Ukrainaning Iqtisodiy rivojlanish, savdo va qishloq xo‘jaligi vazirining o‘rinbosari Taras Kachka bilan uchrashdi. Bu haqda TIV matbuot xizmati xabar berdi.
Tomonlar O‘zbekiston va Ukraina o‘rtasida barcha sohalarda ikki tomonlama munosabatlarni mustahkamlash masalalarini muhokama qildi.
Ta’kidlanishicha, savdo-iqtisodiy va investitsiyaviy sohalarda hamkorlikni kengaytirish istiqbollariga alohida e’tibor qaratilgan. 2019-yilning yanvar—noyabr oylarida ikki mamlakat o‘rtasidagi savdo aylanmasi 348,7 million dollarni tashkil etgan.
Tomonlar hamkorlikni kengaytirishga, jumladan, biznes va iqtisodiy tuzilmalar o‘rtasida o‘zaro manfaatli aloqalarni rivojlantirishga qiziqish bildirdi.
Suhbat chog‘ida turizm, madaniy va gumanitar sohalardagi aloqalarni faollashtirish, xususan, O‘zbekiston va Ukraina tibbiy ta’lim muassasalari o‘rtasida to‘g‘ridan-to‘g‘ri aloqalarni o‘rnatish bo‘yicha takliflar ko‘rib chiqildi.
Eslatib o‘tamiz, 2018-yilda O‘zbekiston va Ukraina savdo-iqtisodiy va ilmiy-texnikaviy hamkorlik bo‘yicha O‘zbekiston—Ukraina hukumatlararo komissiyasining majlisini yilning uchinchi choragida tashkil etishga kelishib olgandi. Biroq uchrashuv amalga oshmagan edi. Hukumatlararo komissiyaning bundan oldingi yig‘ilishi 2007-yili Kiyevda bo‘lib o‘tgan.
Izoh (0)