19 декабрь куни Ўзбекистон ташқи ишлар вазирининг биринчи ўринбосари Илҳом Неъматов Тошкентга ишчи ташриф билан келган Украинанинг Иқтисодий ривожланиш, савдо ва қишлоқ хўжалиги вазирининг ўринбосари Тарас Качка билан учрашди. Бу ҳақда ТИВ матбуот хизмати хабар берди.
Томонлар Ўзбекистон ва Украина ўртасида барча соҳаларда икки томонлама муносабатларни мустаҳкамлаш масалаларини муҳокама қилди.
Таъкидланишича, савдо-иқтисодий ва инвестициявий соҳаларда ҳамкорликни кенгайтириш истиқболларига алоҳида эътибор қаратилган. 2019 йилнинг январь—ноябрь ойларида икки мамлакат ўртасидаги савдо айланмаси 348,7 миллион долларни ташкил этган.
Томонлар ҳамкорликни кенгайтиришга, жумладан, бизнес ва иқтисодий тузилмалар ўртасида ўзаро манфаатли алоқаларни ривожлантиришга қизиқиш билдирди.
Суҳбат чоғида туризм, маданий ва гуманитар соҳалардаги алоқаларни фаоллаштириш, хусусан, Ўзбекистон ва Украина тиббий таълим муассасалари ўртасида тўғридан-тўғри алоқаларни ўрнатиш бўйича таклифлар кўриб чиқилди.
Эслатиб ўтамиз, 2018 йилда Ўзбекистон ва Украина савдо-иқтисодий ва илмий-техникавий ҳамкорлик бўйича Ўзбекистон—Украина ҳукуматлараро комиссиясининг мажлисини йилнинг учинчи чорагида ташкил этишга келишиб олганди. Бироқ учрашув амалга ошмаган эди. Ҳукуматлараро комиссиянинг бундан олдинги йиғилиши 2007 йили Киевда бўлиб ўтган.
Изоҳ (0)