Bugungi tub islohotlar sabab, siyosiy hayotimizda ham muhim o‘zgarishlar yuz beryapti. Yurtdoshlarimizning huquqiy madaniyati yuksalib, qonun, qaror va davlat dasturlariga takliflar bildira boshladik. Parlament, hukumat va deputatlar oldiga dolzarb muammolarni ochiq-oshkora qo‘yib, yechimini talab qilayapmiz. Ya’ni, “Xalq davlat idoralariga emas, davlat idoralari halqqa xizmat qilishi kerak” tamoyili hayotimizda o‘z isbotini topyapti.
“Milliy tiklanish” demokratik partiyasi bu jarayonda “Milliy tiklanishdan — milliy yuksalish sari” g‘oyasini o‘zi uchun dasturilamalga aylantirdi.
Partiya saylovlar arafasida o‘z elektorati va xayrixohlari talabidan kelib chiqqan holda yangi O‘zbekistonda yangi saylovlarni tashkil etishga qaratilgan saylov taktikasini, muhim siyosiy tadbirga tayyorgarlik ko‘rish va o‘tkazish uchun Yo‘l xaritasi, shuningdek, tadbirlar dasturini ishlab chiqdi. Saylovlarda partiyaning munosib ishtirokini ta’minlash maqsadida O‘zbekiston Respublikasi Oliy Majlisi Qonunchilik palatasiga 1 710 nafar, mahalliy Kengashlarga jami 23 220 nafar nomzodlar zahirasi shakllantirildi. Ularning 40 foizini xotin-qizlar tashkil etdi. Bu ko‘rsatkich 2014-yilga nisbatan 6,7 foizga ko‘pdir.
Albatta, siyosiy maydonda odamlar ishonchini qozonish uchun davlat va jamiyat farovonligiga birdek xizmat qiluvchi Platforma zarur edi. Shundan keyin aholi talabidan kelib chiqqan holda “Insonni o‘zgartirish orqali, jamiyatni o‘zgartiramiz” g‘oyasi ostida partiya Dasturi va 2020—2025-yillarga mo‘ljallangan saylovoldi Dasturi ishlab chiqildi.
Partiya, shuningdek, jamiyatimiz uchun eng og‘riqli masala — tarbiya masalasini o‘zi uchun eng dolzarb vazifa sifatida tanlab oldi. Zero, inson ahloqi, ta’lim-tarbiyasiga avvalo oila, ota-ona mas’ul. Ammo O‘zMTDP bu jarayonda qulay sharoit yaratishga o‘zini ham javobgar deb hisoblaydi.
Shu o‘rinda, partiya tarixida birinchi marotaba saylovoldi Platformasi loyihasini muhokama qilishda axborot-kommunikatsiya texnologiyalari imkoniyatlaridan samarali foydalanganini qayd etish lozim. Partiyaning Saylovoldi platformasi deyarli barcha tuman va shaharlarda 4 448 ta turkum uchrashuvlar, davra suhbatlari, ochiq muloqot, vidokonferensiyalar shaklida to‘rt bosqichda jamoatchilik muhokamasidan o‘tkazildi.
Ushbu tadbirlar doirasida 50 ga yaqin roliklar, filmlar, lavhalar tayyorlanib, ijtimoiy tarmoqlarga joylashtirildi. Natijada O‘zbekiston “Milliy tiklanish” demokratik partiyasining saylovoldi Platformasi yuzasidan 14 mingga yaqin takliflar kelib tushdi. Unda yarim millionga yaqin fuqaro bevosita ishtirok etdi. Partiyaning saylovoldi Platformasi loyihasini tayyorlashga davlat va jamoat arboblari xususan, ma’naviy-ma’rifiy sohada O‘zbekiston Respublikasi san’at arbobi Ibrohim G‘ofurov, “O‘zbekkino” Milliy agentligi direktorining birinchi o‘rinbosari Shuhrat Rizayev, iqtisodiy sohani takomillashtirish bo‘yicha “Korzinka.uz” supermarketlar tarmog‘i asoschisi Zafar Xoshimov, axborot sohasida taniqli jurnalist, yozuvchi, filologiya fanlari doktori Xurshid Do‘stmuhammadlar maslahatchi sifatida jalb etildi.
O‘zbekiston “Milliy tiklanish” demokratik partiyasi Markaziy kengashi tashabbusi bilan viloyat va tuman markazlarida partiyaning yangi saylovoldi Platformasiga bag‘ishlangan mitinglar bo‘lib o‘tdi. “Birmiz! Qo‘lni qo‘lga beramiz!” shiori ostida o‘tkazilgan targ‘ibot tadbirlarida Markaziy kengash a’zolari, Oliy Majlis Qonunchilik palatasi deputatlari, boshlang‘ich partiya tashkilotlari vakillari va partiyaga xayrixoh bo‘lgan yoshlar ishtirok etdilar.
Partiya saylovoldi dasturida bosh siyosiy shior sifatida “Milliy tiklanishdan — milliy yuksalish sari!” shiori belgilab olindi. “Insonni o‘zgartish orqali jamiyatni o‘zgartiramiz!” g‘oyasi esa asosiy g‘oya sifatida ilgari surildi. Ana shu g‘oyani amaliyotga joriy etish maqsadida uzluksiz tarbiya tizimini yaratish, oilani mustahkamlash maqsadida ayollarga qulay turmush va mehnat sharoitini yaratish, hamda ularning ish soatlarini qisqartirish, o‘qituvchiga qulay mehnat sharoitini yaratish, parlamentni “xalq uyi”ga aylantirish, davlat tili maqomini oshirish, muqobil kreditlash tizimini amaliyotga tatbiq etish, turizmni rivojlantirish yo‘lidagi muammolarni bartaraf etish, xalq tabobatini rivojlantirish, xorijdagi vatandoshlarimiz manfaatini izchil himoya qilish, tabaqalashtirilgan kommunal to‘lov tizimini joriy etish kabi dolzarb masalalar partiya saylovoldi Dasturiga kiritildi.
Aziz yurtdoshlar!
Kim bo‘lishimiz va qanday sohada faoliyat ko‘rsatishimizdan qat’iy nazar bugun barchamizni yagona maqsad birlashtirib turadi. Bu xalqimiz farovonligi uchun sidqidildan xizmat qilish, yoshlarimizni ona Vatan qadriga yetadigan komil insonlar etib kamol toptirish, ma’naviy va milliy qadriyat, urf-odatlarimiz ruhida tarbiyalashdir. O‘zbekiston “Milliy tiklanish” demokratik partiyasi o‘z maqsad va vazifalaridan kelib chiqqan holda bundag buyon xalq ishonchini qozonish uchun partiyaning yuqori organidan tortib eng quyi bo‘g‘inlari bir g‘oya ostida harakat qilishini, yurtdoshlarimiz manfaati uchun tinimsiz izlanishini ma’lum qiladi. Baxt birlasha olishdadir. Saylov esa haqiqiy ma’noda xalq tanlovi bo‘lishi lozim.
Qadrli vatandoshlar!
Yurt tinchligiga hissa qo‘shish, farovonlikni ta’minlashda jon fido qilish, Vatanimiz taraqqiyotini barqarorlashtirish jarayonida faol ishtirok etish bu — “Milliy tiklanish” partiyasining eng asosiy vazifasidir.
Hurmatli saylovchilar!
O‘zbekiston “Milliy tiklanish” demokratik partiyasi uchun saylovda ishtirok etish – bu, eng avvalo, Sizlar ishonch bildirgan vakillar orqali davlat va jamiyat ishlarini boshqarishda faol ishtirok etishdan iboratdir.
Partiyamizdan ko‘rsatilgan nomzodlarning hokimiyat vakillik organlariga saylanishi, bu nafaqat saylovchilarning yuksak ishonchi, balki Yurt tinchligi, Vatan taraqqiyoti va Xalq farovonligi yo‘lida faol va fidokorona mehnat qilishga shaylangan bo‘lajak deputatlarga berilgan imkoniyat hamdir.
Deputatlikka ko‘rsatilgan nomzodlarning 2020-2024-yillarga mo‘ljallangan saylovoldi Dasturi va undagi tashabbuslar esa jonajon Vatanimizni birgalikda taraqqiy ettirishga doir takliflar majmuasidir.
Partiyamizning saylovoldi Dasturida belgilangan barcha yo‘nalishlar bo‘yicha tashabbuslar – bu islohotlarni sifat jihatdan yangi bosqichga ko‘tarishning debochasi ekanini ham alohida ta’kidlaymiz.
Partiyamiz aniq va samarali natijalarga erishish uchun barchangizni Vatanimiz ravnaqi yo‘lida fidokorona mehnat qilishga, tashabbuskor bo‘lishga chaqiradi.
Ishoning, O‘zbekiston “Milliy tiklanish” demokratik partiyasi nomzodlariga bergan ovozingiz – bu Sizu bizning keyingi besh yillikdagi hayotimiz borasidagi tanlovingizdir!
Qo‘lni qo‘lga beraylik, azizlar!
22-dekabr kuni O‘zbekiston “Milliy tiklanish” demokratik partiyasi nomzodlariga ovoz bering!
O‘zbekiston “Milliy tiklanish” demokratik partiyasi markaziy kengashi axborot xizmati
Reklama huquqi asosida.
Izoh (0)