Бугунги туб ислоҳотлар сабаб, сиёсий ҳаётимизда ҳам муҳим ўзгаришлар юз беряпти. Юртдошларимизнинг ҳуқуқий маданияти юксалиб, қонун, қарор ва давлат дастурларига таклифлар билдира бошладик. Парламент, ҳукумат ва депутатлар олдига долзарб муаммоларни очиқ-ошкора қўйиб, ечимини талаб қилаяпмиз. Яъни, «Халқ давлат идораларига эмас, давлат идоралари ҳалққа хизмат қилиши керак» тамойили ҳаётимизда ўз исботини топяпти.
«Миллий тикланиш» демократик партияси бу жараёнда «Миллий тикланишдан — миллий юксалиш сари» ғоясини ўзи учун дастуриламалга айлантирди.
Партия сайловлар арафасида ўз электорати ва хайрихоҳлари талабидан келиб чиққан ҳолда янги Ўзбекистонда янги сайловларни ташкил этишга қаратилган сайлов тактикасини, муҳим сиёсий тадбирга тайёргарлик кўриш ва ўтказиш учун Йўл харитаси, шунингдек, тадбирлар дастурини ишлаб чиқди. Сайловларда партиянинг муносиб иштирокини таъминлаш мақсадида Ўзбекистон Республикаси Олий Мажлиси Қонунчилик палатасига 1 710 нафар, маҳаллий Кенгашларга жами 23 220 нафар номзодлар заҳираси шакллантирилди. Уларнинг 40 фоизини хотин-қизлар ташкил этди. Бу кўрсаткич 2014 йилга нисбатан 6,7 фоизга кўпдир.
Албатта, сиёсий майдонда одамлар ишончини қозониш учун давлат ва жамият фаровонлигига бирдек хизмат қилувчи Платформа зарур эди. Шундан кейин аҳоли талабидан келиб чиққан ҳолда «Инсонни ўзгартириш орқали, жамиятни ўзгартирамиз» ғояси остида партия Дастури ва 2020—2025 йилларга мўлжалланган сайловолди Дастури ишлаб чиқилди.
Партия, шунингдек, жамиятимиз учун энг оғриқли масала — тарбия масаласини ўзи учун энг долзарб вазифа сифатида танлаб олди. Зеро, инсон аҳлоқи, таълим-тарбиясига аввало оила, ота-она масъул. Аммо ЎзМТДП бу жараёнда қулай шароит яратишга ўзини ҳам жавобгар деб ҳисоблайди.
Шу ўринда, партия тарихида биринчи маротаба сайловолди Платформаси лойиҳасини муҳокама қилишда ахборот-коммуникация технологиялари имкониятларидан самарали фойдаланганини қайд этиш лозим. Партиянинг Сайловолди платформаси деярли барча туман ва шаҳарларда 4 448 та туркум учрашувлар, давра суҳбатлари, очиқ мулоқот, видоконференциялар шаклида тўрт босқичда жамоатчилик муҳокамасидан ўтказилди.
Ушбу тадбирлар доирасида 50 га яқин роликлар, фильмлар, лавҳалар тайёрланиб, ижтимоий тармоқларга жойлаштирилди. Натижада Ўзбекистон «Миллий тикланиш» демократик партиясининг сайловолди Платформаси юзасидан 14 мингга яқин таклифлар келиб тушди. Унда ярим миллионга яқин фуқаро бевосита иштирок этди. Партиянинг сайловолди Платформаси лойиҳасини тайёрлашга давлат ва жамоат арбоблари хусусан, маънавий-маърифий соҳада Ўзбекистон Республикаси санъат арбоби Иброҳим Ғофуров, «Ўзбеккино» Миллий агентлиги директорининг биринчи ўринбосари Шуҳрат Ризаев, иқтисодий соҳани такомиллаштириш бўйича «Korzinka.uz» супермаркетлар тармоғи асосчиси Зафар Хошимов, ахборот соҳасида таниқли журналист, ёзувчи, филология фанлари доктори Хуршид Дўстмуҳаммадлар маслаҳатчи сифатида жалб этилди.
Ўзбекистон «Миллий тикланиш» демократик партияси Марказий кенгаши ташаббуси билан вилоят ва туман марказларида партиянинг янги сайловолди Платформасига бағишланган митинглар бўлиб ўтди. «Бирмиз! Қўлни қўлга берамиз!» шиори остида ўтказилган тарғибот тадбирларида Марказий кенгаш аъзолари, Олий Мажлис Қонунчилик палатаси депутатлари, бошланғич партия ташкилотлари вакиллари ва партияга хайрихоҳ бўлган ёшлар иштирок этдилар.
Партия сайловолди дастурида бош сиёсий шиор сифатида «Миллий тикланишдан — миллий юксалиш сари!» шиори белгилаб олинди. «Инсонни ўзгартиш орқали жамиятни ўзгартирамиз!» ғояси эса асосий ғоя сифатида илгари сурилди. Ана шу ғояни амалиётга жорий этиш мақсадида узлуксиз тарбия тизимини яратиш, оилани мустаҳкамлаш мақсадида аёлларга қулай турмуш ва меҳнат шароитини яратиш, ҳамда уларнинг иш соатларини қисқартириш, ўқитувчига қулай меҳнат шароитини яратиш, парламентни «халқ уйи»га айлантириш, давлат тили мақомини ошириш, муқобил кредитлаш тизимини амалиётга татбиқ этиш, туризмни ривожлантириш йўлидаги муаммоларни бартараф этиш, халқ табобатини ривожлантириш, хориждаги ватандошларимиз манфаатини изчил ҳимоя қилиш, табақалаштирилган коммунал тўлов тизимини жорий этиш каби долзарб масалалар партия сайловолди Дастурига киритилди.
Азиз юртдошлар!
Ким бўлишимиз ва қандай соҳада фаолият кўрсатишимиздан қатъий назар бугун барчамизни ягона мақсад бирлаштириб туради. Бу халқимиз фаровонлиги учун сидқидилдан хизмат қилиш, ёшларимизни она Ватан қадрига етадиган комил инсонлар этиб камол топтириш, маънавий ва миллий қадрият, урф-одатларимиз руҳида тарбиялашдир. Ўзбекистон «Миллий тикланиш» демократик партияси ўз мақсад ва вазифаларидан келиб чиққан ҳолда бундаг буён халқ ишончини қозониш учун партиянинг юқори органидан тортиб энг қуйи бўғинлари бир ғоя остида ҳаракат қилишини, юртдошларимиз манфаати учун тинимсиз изланишини маълум қилади. Бахт бирлаша олишдадир. Сайлов эса ҳақиқий маънода халқ танлови бўлиши лозим.
Қадрли ватандошлар!
Юрт тинчлигига ҳисса қўшиш, фаровонликни таъминлашда жон фидо қилиш, Ватанимиз тараққиётини барқарорлаштириш жараёнида фаол иштирок этиш бу — «Миллий тикланиш» партиясининг энг асосий вазифасидир.
Ҳурматли сайловчилар!
Ўзбекистон «Миллий тикланиш» демократик партияси учун сайловда иштирок этиш – бу, энг аввало, Сизлар ишонч билдирган вакиллар орқали давлат ва жамият ишларини бошқаришда фаол иштирок этишдан иборатдир.
Партиямиздан кўрсатилган номзодларнинг ҳокимият вакиллик органларига сайланиши, бу нафақат сайловчиларнинг юксак ишончи, балки Юрт тинчлиги, Ватан тараққиёти ва Халқ фаровонлиги йўлида фаол ва фидокорона меҳнат қилишга шайланган бўлажак депутатларга берилган имконият ҳамдир.
Депутатликка кўрсатилган номзодларнинг 2020-2024 йилларга мўлжалланган сайловолди Дастури ва ундаги ташаббуслар эса жонажон Ватанимизни биргаликда тараққий эттиришга доир таклифлар мажмуасидир.
Партиямизнинг сайловолди Дастурида белгиланган барча йўналишлар бўйича ташаббуслар – бу ислоҳотларни сифат жиҳатдан янги босқичга кўтаришнинг дебочаси эканини ҳам алоҳида таъкидлаймиз.
Партиямиз аниқ ва самарали натижаларга эришиш учун барчангизни Ватанимиз равнақи йўлида фидокорона меҳнат қилишга, ташаббускор бўлишга чақиради.
Ишонинг, Ўзбекистон «Миллий тикланиш» демократик партияси номзодларига берган овозингиз – бу Сизу бизнинг кейинги беш йилликдаги ҳаётимиз борасидаги танловингиздир!
Қўлни қўлга берайлик, азизлар!
22 декабрь куни Ўзбекистон «Миллий тикланиш» демократик партияси номзодларига овоз беринг!
Ўзбекистон «Миллий тикланиш» демократик партияси марказий кенгаши ахборот хизмати
Реклама ҳуқуқи асосида.
Изоҳ (0)