Toshkent shahar Ichki ishlar bosh boshqarmasi Chilonzor tumani IIO FMB xodimlari bekatda tunab yurgan 47 yoshli Gulbahor opaga (ismlar o‘zgartirilgan) va tilanchilik bilan shug‘ullanayotgan boshqa ayollarga ko‘mak berdi. Bu haqda Toshkent shahar IIBB xabar bergan.
Issiq choy bahonasida samarqandlik ayol bilan qilingan suhbat davomida uning Toshkentga uy-joy masalasini hal etish uchun kelgani, ammo poytaxtda yashovchi qarindoshlari yo‘q bo‘lgani tufayli bekatda tunashga majbur bo‘lgani oydinlashdi. Xodimlar Samarqand viloyati IIBdagi hamkasblariga bu haqda ma’lum qilib, holatni o‘rganish maqsadida hujjatlar nusxalarini yuborgan.
Xotin-qizlar masalalari bo‘yicha profilaktika inspektorlari Chilonzor tumanidagi buyum bozorida tilanchilik qilayotgan 57 yoshli Mahbuba ismli ayolga ham yordam ko‘rsatdi. Turmush o‘rtog‘i vafotidan keyin farzandlari ko‘chaga haydagan, ayol o‘g‘li ham olamdan o‘tganini bildirdi, u haqidagi ma’lumotlar Samarqand viloyati IIBga yuborilib, uning o‘zi muayyan yashash joyiga ega bo‘lmagan shaxslarni reabilitatsiya qilish markaziga joylashtirildi.
40 yoshli Manzura va uning 10 yoshli voyaga yetmagan qizi bilan Yuqorichirchiqdan kelib tilanchilik qilayotgani, oilasi og‘ir ahvolda ekani, turmush o‘rtog‘i nogironligi, ikki farzandi bilan oilasini boqish maqsadida shu yo‘lga kirganini hikoya qilgan. Uning sharoitini o‘rganish bo‘yicha Toshkent viloyati IIBBga tegishli hujjatlar yo‘naltirilgan.
Izoh (0)