Ichki ishlar organlariga kadrlarni tanlash, ularning zaxirasini shakllantirish, xodimlar o‘rtasida xizmat intizomi va qonuniylikni ta’minlashga qaratilgan qo‘shimcha chora-tadbirlar bo‘yicha vazirlik tarkibiy va hududiy organlari kadrlar xizmati rahbarlari uchun seminar-trening tashkil etildi. Bu haqda Ichki ishlar vazirligi axborot xizmati “Daryo”ga ma’lum qildi.
Ma’lum qilinishicha, ishtirokchilar 4-dekabr kuni Toshkent shahar IIBB Ichki ishlar organlariga xizmatga qabul qilish markazi faoliyati bilan yaqindan tanishdi. Ularga ichki ishlar organlari (ta’lim muassasalari)ga nomzodlarni qabul qilish va ularning hujjatlarini rasmiylashtirish jarayonlari ko‘rgazmasi namoyish etildi. Shuningdek, nomzodlar bilan dastlabki suhbat, psixologik o‘rganish, ularning umumjismoniy tayyorgarlik darajasini baholash hamda yakuniy suhbat jarayonlari bo‘yicha batafsil ma’lumot berildi.
Shundan so‘ng seminar-treningda ichki ishlar organlari kadrlar xizmati faoliyatiga doir qator dolzarb mavzularda ma’ruzalar qilindi. Mavzular yuzasidan fikr-mulohazalar tinglanib, tegishli takliflar bildirildi.
Izoh (0)