Жорий йилнинг 4—5 декабрь кунлари Ички ишлар вазирлиги Кадрлар бош бошқармаси ташаббуси билан ички ишлар органларига кадрларни танлаш, уларнинг захирасини шакллантириш йўналишида таркибий ва ҳудудий органлар кадрлар бўлинмалари раҳбарлари иштирокида танқидий руҳдаги йиғилиш ўтказилди. Бу ҳақда Ички ишлар вазирлиги «Дарё»га маълум қилди.
Мавзуга доир: ИИВ таркибий ва ҳудудий органлари кадрлар хизмати раҳбарлари учун семинар-тренинг ўтказилди
Шунингдек, ҳозирги кунда ходимлар ўртасида хизмат интизоми ва қонунийликни мустаҳкамлаш, ўқитиш, малакасини ошириш борасида қатор ишлар амалга оширилаётгани қайд этилди. Шу билан бирга, айрим мутасадди раҳбарларнинг ушбу масалага ўта масъулиятсизлик билан ёндашиб келаётганлиги, тизимда ҳамон нопок ходимлар томонидан хизмат бурчига, қасамёдига хоинлик қилиниб, порахўрлик, таъмагирлик, мансаб ваколатини суиистеъмол қилиш каби хатти-ҳаракатлар содир этилиши давом этаётганлиги танқид қилинди.
Жумладан, жорий йилда энг кўп интизом бузиш ҳолатлари Йўл ҳаракати хавфсизлиги (820 та), Патрул-пост (508 та) ҳамда Миграция ва фуқароликни расмийлаштириш (127 та) хизматлари ҳиссасига тўғри келган. Шу муносабат билан ушбу соҳавий хизматларнинг барча шахсий таркибини йил якунига қадар навбатдан ташқари аттестациядан ўтказиш тўғрисида топшириқ берилди.
Бу борада Ички ишлар вазирлиги марказий аппарати, ўқув муассасалари, Қорақалпоғистон Республикаси Ички ишлар вазирлиги, Тошкент шаҳар ва Тошкент вилояти ички ишлар бош бошқармалари, вилоятлар ички ишлар бошқармалари кадрлар билан ишлаш хизматлари раҳбарлари йўл қўйган камчиликлари учун қаттиқ огоҳлантирилиб, йил якунига қадар фаолиятида ўзгариш қилмаган тақдирда уларнинг лавозимларида қолиш ёки қолмаслик масалалари кўриб чиқилиши ҳақида огоҳлантирилди.
Шунингдек, порахўрлик, таъмагирлик, мансаб ваколатини суиистеъмол қилиш каби салбий иллатларга мойиллиги бор нопок ходимларни барвақт аниқлаш ва уларни тизимдан четлаштириш чораларини кўриш юзасидан мутасадди раҳбарларга тегишли топшириқлар берилди.
Изоҳ (0)