O‘zbekiston terma jamoasining sobiq yarim himoyachisi va hozirda bosh jamoada Vadim Abramovga yordam berayotgan Temur Kapadze O‘zbekiston U-19 terma jamoasiga bosh murabbiy etib tayinlandi. Bu haqida O‘zbekiston futbol assotsiatsiyasi rasmiy saytida ma’lum qilindi.
Ma’lumot uchun, noyabr oyida o‘tkazilgan U-19 Osiyo Chempionati—2020 saralash bahslari doirasida kechgan Saudiya Arabistoni — O‘zbekiston uchrashuvidan (1:1) so‘ng yoshlar terma jamoasi bosh murabbiyi Otabek G‘ulomxo‘jayev rahbarligidagi murabbiylar shtabi egallab turgan lavozimidan ozod etilgan edi.
Saudiyaliklarni Toshkentda o‘tadigan Osiyo Chempionatiga olib chiqqan mazkur o‘yinning birinchi bo‘limida o‘zbekistonlik futbolchi hakam tomonidan qizil kartochkaga loyiq ko‘rilgandi. Shuningdek, vaziyatlarning birida O‘zbekiston darvozasi tomon penalti belgilangan. O‘z navbatida bu mehmon futbolchilar va murabbiylar shtabiga yoqmagan. Alisher Nikembayevning xabariga ko‘ra, uchrashuvdan so‘ng ikki tomon o‘rtasida janjal yuzaga kelgan.
Mazkur uchrashuvdagi holatdan keyin Osiyo futbol konfederatsiyasi O‘FAga shikoyat maktubi yo‘llagan va bunga chora ko‘rilmagan taqdirda O‘zbekiston yoshlar terma jamoasi musobaqadan chetlatilishi mumkinligi haqida ogohlantirgandi. O‘z navbatida O‘FA tartib-intizom qo‘mitasi Saudiya Arabistonida bo‘lib o‘tgan voqealar videoyozuvini ko‘rib chiqqan va G‘ulomxo‘jayevni o‘z vazifasidan ozod qilgandi.
2020-yilning 14—31-oktabr kunlari Toshkentda Yoshlar o‘rtasida Osiyo chempionatining final bosqichi bo‘lib o‘tadi. Unga mazkur jamoani Temur Kapadze tayyorlaydi. O‘z navbatida Kapadze O‘zbekiston terma jamoasidagi murabbiylik faoliyatini ham davom ettiradi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)