Ўзбекистон терма жамоасининг собиқ ярим ҳимоячиси ва ҳозирда бош жамоада Вадим Абрамовга ёрдам бераётган Темур Кападзе Ўзбекистон U-19 терма жамоасига бош мураббий этиб тайинланди. Бу ҳақида Ўзбекистон футбол ассоциацияси расмий сайтида маълум қилинди.
Маълумот учун, ноябрь ойида ўтказилган U-19 Осиё Чемпионати—2020 саралаш баҳслари доирасида кечган Саудия Арабистони — Ўзбекистон учрашувидан (1:1) сўнг ёшлар терма жамоаси бош мураббийи Отабек Ғуломхўжаев раҳбарлигидаги мураббийлар штаби эгаллаб турган лавозимидан озод этилган эди.
Саудияликларни Тошкентда ўтадиган Осиё Чемпионатига олиб чиққан мазкур ўйиннинг биринчи бўлимида ўзбекистонлик футболчи ҳакам томонидан қизил карточкага лойиқ кўрилганди. Шунингдек, вазиятларнинг бирида Ўзбекистон дарвозаси томон пенальти белгиланган. Ўз навбатида бу меҳмон футболчилар ва мураббийлар штабига ёқмаган. Алишер Nikeмбаевнинг хабарига кўра, учрашувдан сўнг икки томон ўртасида жанжал юзага келган.
Мазкур учрашувдаги ҳолатдан кейин Осиё футбол конфедерацияси ЎФАга шикоят мактуби йўллаган ва бунга чора кўрилмаган тақдирда Ўзбекистон ёшлар терма жамоаси мусобақадан четлатилиши мумкинлиги ҳақида огоҳлантирганди. Ўз навбатида ЎФА тартиб-интизом қўмитаси Саудия Арабистонида бўлиб ўтган воқеалар видеоёзувини кўриб чиққан ва Ғуломхўжаевни ўз вазифасидан озод қилганди.
2020 йилнинг 14—31 октябрь кунлари Тошкентда Ёшлар ўртасида Осиё чемпионатининг финал босқичи бўлиб ўтади. Унга мазкур жамоани Темур Кападзе тайёрлайди. Ўз навбатида Кападзе Ўзбекистон терма жамоасидаги мураббийлик фаолиятини ҳам давом эттиради.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)