Afg‘oniston sobiq prezidenti Hamid Karzay Xitoyda o‘tadigan xalqaro afg‘on uchrashuvida mamlakatning amaldagi davlat rahbari Ashraf G‘aniga yoqmagani uchun ishtirok eta olmayotganini ma’lum qildi.
O‘tgan haftada Xitoy xalq respublikasi Afg‘onistonga “Tolibon” harakati bilan mamlakatda tinchlik o‘rnatish yuzasidan muzokaralar o‘tkazishga sharoit yaratib berishni va’da qilgan.
Xalqaro tadbirni 28-oktabrda o‘tkazish rejalashtirilgandi, biroq keyinroq uchrashuvning muddati o‘zgardi. “Tolibon” harakati kechikishga Afg‘oniston hukumati aybdorligini bildirgan. Xitoyning taklifi hali ham o‘z kuchida, Chin yurti xalqaro afg‘on masalalari muhokamasiga mezbonlik qilishga tayyor.
Biroq mamlakat hukumatining ushbu uchrashuvda ishtirok etadigan delegatsiyasi tarkibi noma’lumligicha qolmoqda. Sobiq prezident Hamid Karzay ushbu tadbirda ishtirok etishni istagani, ammo Ashraf G‘anining bunga to‘sqinlik qilayotganini aytgan.
Mavzuga doir:
Karzay tinchlikni istovchi siyosatchilarga bosim o‘tkazilayotganidan xavotirda ekani, xususan, Moskvada o‘tgan xalqaro afg‘on uchrashuvidan keyin Abdul Salom Zaif uyi yonida hujum uyushtirilgani, shuningdek, siyosatchi Vohid Mo‘jdiyning o‘ldirilganini eslatib o‘tdi.
Hamid Karzay huquq-tartibot organlari va xavfsizlik tuzilmalarini xalq himoyachisi bo‘lib qolish hamda siyosiy o‘yinlar ishtirokchisi bo‘lmaslikka chaqirdi.
Izoh (0)