Xitoy Xalq Respublikasi tashqi ishlar vazirining o‘rinbosari Chjen Szeguan AQShning Xitoydagi elchisi Terri Brenstedga AQSh senati va vakillar palatasi tomonidan qabul qilingan “Gonkongda inson huquqlari va demokratiya to‘g‘risidagi” qonun loyihasi sabab norozilik notasini topshiradi, deyiladi Xitoy TIV bayonotida. Bu haqda “RIA Novosti” xabar bergan.
AQSh vakillar palatasi deputatlari o‘tgan haftada “Gonkongda inson huquqlari va demokratiya to‘g‘risidagi” qonun loyihasini qabul qilgan, avvalroq senat ham ushbu hujjatni ma’qullagandi. Qonun imzolanishi va kuchga kirishi uchun AQSh prezidenti Donald Trampga kiritilgan.
“Gonkong ishi Xitoyning ichki siyosiy masalasi hisoblanadi, hech bir xorij davlatining ushbu jarayonga aralashishiga haqi yo‘q. AQSh ushbu qonun loyihasini ishlab chiqish orqali ochiqdan ochiq XXR ishlariga aralashmoqda, haqiqatni inkor etib, qorani oq deb, xalqaro huquq me’yorlariga amal qilmagan holda Xitoyga qarshi kayfiyat uyg‘otishga urinmoqda. Xitoy hukumati bundan norozi va ushbu harakatga e’tiroz bildiradi”, — deydi Chjen Szeguan imzolagan TIV bayonotida.
Pekin Vashingtondan bunday xato harakatlarni to‘g‘irlash va XXR, jumladan, Gonkongning ichki siyosatiga aralashmaslikni so‘ragan.
“Xitoy davlat suvereniteti, milliy xavfsizlik va mamlakat taraqqiyotini himoya qiladi. Davlatdagi “bir mamlakat, ikki tizim” tamoyilini amalga oshirish davom etadi hamda har qanday tashqi kuchlarning Gonkong ishiga aralashuviga yo‘l qo‘yilmaydi”, — deydi amaldor.
“Biz AQShdan vaziyatning jiddiy ekanini tushunish, xatolarni tuzatish, qonunni imzolash jarayonini to‘xtatish, Gonkong va Xitoyning ichki ishlariga aralashmasligini so‘raymiz, aks holda ushbu harakatlar oqibati uchun mas’uliyat Vashington zimmasida qoladi”, — deyilgan bayonotda.
Mavzuga doir:
Izoh (0)