Surxondaryo viloyatida so‘nggi 3 yil davomida xususiy tibbiyot muassasalari 2 barobarga ko‘payib, 120 tadan 230 taga yetdi, deb yozmoqda SSV matbuot xizmati. Turkiyaning Kani-med, Niderlandiyaning Aues saglik group kompaniyalari tomonidan zamonaviy laboratoriya markazi tashkil etilishi ham buning isbotidir.
Qayd etilishicha, Turkiyaning Kani-med kompaniyasi laboratoriya markazlarini qurish va jihozlash bo‘yicha katta tajribaga ega. Mazkur kompaniya boshqa ko‘plab rivojlangan mamlakatlarda ham ushbu yo‘nalishda markazlarni barpo etib, mutaxassislarga zamonaviy uskunalarda ishlash uslublarini o‘rgatib kelgan.
Shu sababli ushbu nufuzli kompaniyaning Termiz shahrida zamonaviy laboratoriya markazini tashkil etish taklifi qo‘llab-quvvatlanib, viloyat oftalmologiya shifoxonasiga qarashli bo‘lgan bino investitsiya va ijtimoiy shartlar evaziga Kani-med kompaniyasiga beriladi.
2019-yil boshida boshlangan ushbu muhim loyiha doirasida qurilish, jihozlash va faoliyatni elektron tashkil etish ishlarga 2 million dollariga yaqin investitsiya qiritildi. Natijada 30 nafar yangi ish o‘rni yaratilib, 300 turdan ortiq laboratoriya tahlillarini bajarish imkoniyatiga ega markaz bunyod etilgan.
“Endilikda murakkab laboratoriya tahlillarini bajarish uchun Toshkentga borish shart emas. Tahlil javoblari ham o‘sha kunning o‘zida fuqaroning elektron manzili yoki mobil telefoniga yuboriladi”, — deyiladi xabarda.
Shuningdek, ushbu markaz nafaqat Surxondaryo viloyatida, balki O‘zbekiston bo‘yicha ham eng zamonaviy laboratoriyalar qatoridan o‘rin olishi, unda Turkiyadan kelgan malakali tibbiyot xodimlari mahalliy mutaxassislarni tayyorlashda yaqindan yordam berishi va faoliyat ko‘rsatishi ta’kidlangan.
Izoh (0)