Сурхондарё вилоятида сўнгги 3 йил давомида хусусий тиббиёт муассасалари 2 баробарга кўпайиб, 120 тадан 230 тага етди, деб ёзмоқда ССВ матбуот хизмати. Туркиянинг Kani-med, Нидерландиянинг Aues saglik group компаниялари томонидан замонавий лаборатория маркази ташкил этилиши ҳам бунинг исботидир.
Қайд этилишича, Туркиянинг Kani-med компанияси лаборатория марказларини қуриш ва жиҳозлаш бўйича катта тажрибага эга. Мазкур компания бошқа кўплаб ривожланган мамлакатларда ҳам ушбу йўналишда марказларни барпо этиб, мутахассисларга замонавий ускуналарда ишлаш услубларини ўргатиб келган.
Шу сабабли ушбу нуфузли компаниянинг Термиз шаҳрида замонавий лаборатория марказини ташкил этиш таклифи қўллаб-қувватланиб, вилоят офталмология шифохонасига қарашли бўлган бино инвестиция ва ижтимоий шартлар эвазига Kani-med компаниясига берилади.
2019 йил бошида бошланган ушбу муҳим лойиҳа доирасида қурилиш, жиҳозлаш ва фаолиятни электрон ташкил этиш ишларга 2 миллион долларига яқин инвестиция қиритилди. Натижада 30 нафар янги иш ўрни яратилиб, 300 турдан ортиқ лаборатория таҳлилларини бажариш имкониятига эга марказ бунёд этилган.
«Эндиликда мураккаб лаборатория таҳлилларини бажариш учун Тошкентга бориш шарт эмас. Таҳлил жавоблари ҳам ўша куннинг ўзида фуқаронинг электрон манзили ёки мобил телефонига юборилади», — дейилади хабарда.
Шунингдек, ушбу марказ нафақат Сурхондарё вилоятида, балки Ўзбекистон бўйича ҳам энг замонавий лабораториялар қаторидан ўрин олиши, унда Туркиядан келган малакали тиббиёт ходимлари маҳаллий мутахассисларни тайёрлашда яқиндан ёрдам бериши ва фаолият кўрсатиши таъкидланган.
Изоҳ (0)