Ichki ishlar vazirligi Yo‘l harakati xavfsizligi bosh boshqarmasi ob-havo keskin sovib ketgani munosabati bilan yo‘l harakati qatnashchilarini yo‘llarda harakatlanishda ehtiyotkorroq bo‘lishga chaqirdi.
Ta’kidlanishicha, hafta davomida respublika hududida ob-havoning keskin o‘zgarishi, qor yog‘ishi va avtomobil yo‘llarida muzlamalar hosil bo‘lishi, havo haroratining keskin sovib ketishi kutilmoqda. Bu esa yo‘l harakati qatnashchilari uchun bir qator noqulayliklarni keltirib chiqarishi, yo‘l-transport hodisalari sodir etilishiga sabab bo‘lishi mumkin.
Mavzuga doir: Favqulodda vaziyatlar vazirligi haydovchilarni Qamchiq dovonidan o‘tayotganda hushyor bo‘lishga chaqirdi
“Biz barcha haydovchilardan transport vositasini boshqarish paytida murakkab ob-havo sharoitini hisobga olishlarini, zarurat bo‘lmaganda tunggi vaqtlarda harakatlanmaslikni, ayniqsa, tezlik talablariga qat’iy amal qilishlarini, piyodalardan yo‘lni kesib o‘tishda o‘ta hushyor bo‘lishlarini, kattalardan yo‘llarda bolalarning harakatini nazoratga olishlarini so‘raymiz”, — deyiladi IIV YHX bosh boshqarmasi xabarida.
Shuningdek, dovon yo‘llaridan harakatlanayotgan haydovchilardan yanada hushyorroq bo‘lish, dovonga chiqishda yetarlicha miqdorda yonilg‘i zahirasiga ega bo‘lish, isitish tizimi, oyna tozalagichlari nosoz bo‘lgan, yaroqsiz shinalar o‘rnatilgan transport vositalaridan foydalanmaslik so‘ralgan.
Izoh (0)