Qoraqalpog‘iston Respublikasining Qo‘ng‘irot tumanida yuz bergan yong‘inda 2014-yilda tug‘ilgan qiz halok bo‘ldi. Bu haqda O‘zbekiston FVV Yong‘in xavfsizligi bosh boshqarmasi xabar berdi.
Ma’lum qilinishicha, 21-noyabr, payshanba kuni soat 22:28 da Qoraqalpog‘iston Respublikasi Qo‘ng‘irot tumani “Talliq” MFYda joylashgan fuqaro M.T.ning uyida yong‘in sodir bo‘layotganligi haqida yong‘in-qutqaruv xizmatiga xabar kelib tushgan. Voqea joyiga beshta yong‘in o‘chirish bo‘linmasi jalb etilgan.
Eng yaqin yong‘in-qutqaruv qismigacha bo‘lgan masofa 10 kilometrni tashkil qilgani sababli, birinchi bo‘linma chaqirilgan manzilga 10 daqiqada yetib borgan. Ko‘rilgan tezkor harakatlar natijasida yong‘in soat 23:24 da qurshab olingan va soat 00:20 da to‘liq bartaraf etilgan.
Yong‘in haqida kech xabar berilganligi sababli, jangovar bo‘linmalar chaqirilgan manzilga yetib kelganida, yong‘inning maydoni kengayib ketgani ma’lum bo‘lgan. Alanganing qo‘shni xonadonlarga o‘tib ketishining oldi olingan.
Yong‘in oqibatida yashash uyining 100 kvadrat metr maydonida tom, shift va ichki jihozlar yongan. Yong‘inni o‘chirish vaqtida uy egasining 2014-yilda tug‘ilgan qiz nabirasi T.Ya.ning kuygan holdagi jasadi topilgan.
Yong‘inning taxminiy sababi sifatida isitish pechi mo‘risining nosozligi aytilmoqda. Moddiy zarar miqdori aniqlanmoqda.
Avvalroq Andijonda gaz chaqnashi tufayli fuqaroning uyi portlagan, uch kishi kuyish jarohati bilan kasalxonaga yotqizilgan edi. Farg‘ona viloyatida esa gaz to‘planib qolgan uy portlagan edi.
Izoh (0)