O‘zbekiston Prezidenti Shavkat Mirziyoyev 22-noyabr, juma kuni mamlakatda tashrif bilan bo‘lib turgan Italiyaning Lombardiya viloyati gubernatori Attilio Fontana boshchiligidagi delegatsiyani qabul qildi. Bu haqda Prezident matbuot xizmati xabar berdi.
Uchrashuvda O‘zbekiston va Italiya o‘rtasidagi ko‘p qirrali munosabatlarni kengaytirish, jumladan, Italiya va Yevropa Ittifoqining yetakchi sanoat, intellektual va madaniy markazlaridan biri bo‘lgan Lombardiya bilan amaliy hamkorlikni rivojlantirishning istiqbollari ko‘rib chiqildi.
Faol ishbilarmonlik aloqalari va o‘zaro almashinuvlarni yo‘lga qo‘yish, Italiyaning kompaniya va tashkilotlari bilan savdo, investitsiyalar, sanoat texnologiyalari, qishloq xo‘jaligi, sog‘liqni saqlash va turizm sohalarida qo‘shma dastur va loyihalarni amalga oshirish muhimligi qayd etildi.
Lombardiyaning taniqli universitetlari bilan yuqori malakali, avvalo, muhandislik ixtisosliklari bo‘yicha mutaxassislar tayyorlash borasidagi hamkorlikka alohida e’tibor qaratildi.
Oliy darajadagi ikki tomonlama tadbirlarga tayyorgarlik ko‘rish doirasida O‘zbekiston va Italiyaning ushbu hududi o‘rtasida o‘zaro manfaatli hamkorlikni chuqurlashtirish bo‘yicha “yo‘l xaritasi”ni qabul qilishga kelishib olindi.
Izoh (0)