Қорақалпоғистон Республикасининг Қўнғирот туманида юз берган ёнғинда 2014 йилда туғилган қиз ҳалок бўлди. Бу ҳақда Ўзбекистон ФВВ Ёнғин хавфсизлиги бош бошқармаси хабар берди.
Маълум қилинишича, 21 ноябрь, пайшанба куни соат 22:28 да Қорақалпоғистон Республикаси Қўнғирот тумани «Таллиқ» МФЙда жойлашган фуқаро М.Т.нинг уйида ёнғин содир бўлаётганлиги ҳақида ёнғин-қутқарув хизматига хабар келиб тушган. Воқеа жойига бешта ёнғин ўчириш бўлинмаси жалб этилган.
Энг яқин ёнғин-қутқарув қисмигача бўлган масофа 10 километрни ташкил қилгани сабабли, биринчи бўлинма чақирилган манзилга 10 дақиқада етиб борган. Кўрилган тезкор ҳаракатлар натижасида ёнғин соат 23:24 да қуршаб олинган ва соат 00:20 да тўлиқ бартараф этилган.
Ёнғин ҳақида кеч хабар берилганлиги сабабли, жанговар бўлинмалар чақирилган манзилга етиб келганида, ёнғиннинг майдони кенгайиб кетгани маълум бўлган. Аланганинг қўшни хонадонларга ўтиб кетишининг олди олинган.
Ёнғин оқибатида яшаш уйининг 100 квадрат метр майдонида том, шифт ва ички жиҳозлар ёнган. Ёнғинни ўчириш вақтида уй эгасининг 2014 йилда туғилган қиз набираси Т.Я.нинг куйган ҳолдаги жасади топилган.
Ёнғиннинг тахминий сабаби сифатида иситиш печи мўрисининг носозлиги айтилмоқда. Моддий зарар миқдори аниқланмоқда.
Аввалроқ Андижонда газ чақнаши туфайли фуқаронинг уйи портлаган, уч киши куйиш жароҳати билан касалхонага ётқизилган эди. Фарғона вилоятида эса газ тўпланиб қолган уй портлаган эди.
Изоҳ (0)