O‘zbekistonda shu kunga qadar buzilgan ko‘chmas mulk obyektlari bo‘yicha davlatning mulk egalari oldidagi qarzi 1,1 trillion so‘mni tashkil qiladi. Bu haqda “Kun.uz” xabar berdi.
Oliy Majlisi Qonunchilik palatasida 21-noyabr, payshanba kuni Vazirlar Mahkamasining davlat budjeti va davlat maqsadli jamg‘armalarining budjetlari ijrosi bo‘yicha to‘qqiz oylik hisoboti ko‘rib chiqildi.
Yig‘ilishda deputat Rasul Kusherboyev hukumat vakillaridan jismoniy va yuridik shaxslarning binolari buzilishi natijasida yuzaga kelgan qarzlar haqida ma’lumot berishni so‘ragan.
Moliya vaziri o‘rinbosari Yorqin Tursunov tomonidan ma’lum qilinishicha, O‘zbekiston Prezidentining joriy yil 3-avgustidagi ko‘rsatmasiga asosan barcha viloyatlarda Hisob palatasi rahbarligida maxsus ishchi guruhlari tuzilgan va ular tomonidan qarzlar inventarizatsiyadan o‘tkazilgan.
Ma’lum bo‘lishicha, O‘zbekistonda 4378 ta obyektning buzilishi natijasida 1,1 trillion so‘m miqdorida qarzdorlik yuzaga kelgan. Xususan,
- Toshkent shahri — 600 milliard so‘m;
- Toshkent viloyati — 210 milliard so‘m;
- Qashqadaryo viloyati — 68 milliard so‘m;
- Surxondaryo viloyati — 56 milliard so‘m;
- Farg‘ona viloyati — 45 milliard so‘m:
- Jizzax viloyati — 43 milliard so‘m;
- Boshqa viloyatlar — 68 milliard so‘m.
Yorqin Tursunovning so‘zlariga ko‘ra, Prezidentga qarzdorlik haqida barcha ma’lumot yetkazilgan va ularni qoplash bo‘yicha taklif ishlab chiqilgan.
Taklifni ishlab chiqish jarayonida juda katta miqdorda qarzdorlik yuzaga kelgan ba’zi hududlarda respublika budjetidan pul ajratilmasa, qarzni qoplab bo‘lmasligi hisobga olingan.
Qarzlarni qoplash uchun respublika budjetidan jami 174 milliard so‘m, mahalliy budjetlardan esa 183 milliard so‘m ajratish rejalashtirilmoqda. Bundan tashqari, 733 milliard so‘m miqdoridagi qarzlar bo‘sh yotgan obyektlari va qo‘shimcha yer uchastkalarini berish hisobidan qoplanishi ko‘zlanmoqda.
Yorqin Tursunovning so‘zlariga ko‘ra, davlat rahbari mazkur takliflarni ma’qullagan va 14-noyabrda Vazirlar Mahkamasining tegishli qarori qabul qilingan.
Izoh (0)