Ўзбекистонда шу кунга қадар бузилган кўчмас мулк объектлари бўйича давлатнинг мулк эгалари олдидаги қарзи 1,1 триллион сўмни ташкил қилади. Бу ҳақда «Kun.uz» хабар берди.
Олий Мажлиси Қонунчилик палатасида 21 ноябрь, пайшанба куни Вазирлар Маҳкамасининг давлат бюджети ва давлат мақсадли жамғармаларининг бюджетлари ижроси бўйича тўққиз ойлик ҳисоботи кўриб чиқилди.
Йиғилишда депутат Расул Кушербоев ҳукумат вакилларидан жисмоний ва юридик шахсларнинг бинолари бузилиши натижасида юзага келган қарзлар ҳақида маълумот беришни сўраган.
Молия вазири ўринбосари Ёрқин Турсунов томонидан маълум қилинишича, Ўзбекистон Президентининг жорий йил 3 августидаги кўрсатмасига асосан барча вилоятларда Ҳисоб палатаси раҳбарлигида махсус ишчи гуруҳлари тузилган ва улар томонидан қарзлар инвентаризациядан ўтказилган.
Маълум бўлишича, Ўзбекистонда 4378 та объектнинг бузилиши натижасида 1,1 триллион сўм миқдорида қарздорлик юзага келган. Хусусан,
- Тошкент шаҳри — 600 миллиард сўм;
- Тошкент вилояти — 210 миллиард сўм;
- Қашқадарё вилояти — 68 миллиард сўм;
- Сурхондарё вилояти — 56 миллиард сўм;
- Фарғона вилояти — 45 миллиард сўм:
- Жиззах вилояти — 43 миллиард сўм;
- Бошқа вилоятлар — 68 миллиард сўм.
Ёрқин Турсуновнинг сўзларига кўра, Президентга қарздорлик ҳақида барча маълумот етказилган ва уларни қоплаш бўйича таклиф ишлаб чиқилган.
Таклифни ишлаб чиқиш жараёнида жуда катта миқдорда қарздорлик юзага келган баъзи ҳудудларда республика бюджетидан пул ажратилмаса, қарзни қоплаб бўлмаслиги ҳисобга олинган.
Қарзларни қоплаш учун республика бюджетидан жами 174 миллиард сўм, маҳаллий бюджетлардан эса 183 миллиард сўм ажратиш режалаштирилмоқда. Бундан ташқари, 733 миллиард сўм миқдоридаги қарзлар бўш ётган объектлари ва қўшимча ер участкаларини бериш ҳисобидан қопланиши кўзланмоқда.
Ёрқин Турсуновнинг сўзларига кўра, давлат раҳбари мазкур таклифларни маъқуллаган ва 14 ноябрда Вазирлар Маҳкамасининг тегишли қарори қабул қилинган.
Изоҳ (0)