“O‘zbekoziqovqatxolding” rahbari Rossiyada bankrot deb tan olindi

Rossiyaning Voronej viloyati arbitraj sudi GM Uzbekistan’ning sobiq bosh direktori, Voronejdagi Uz-Daewoo dilerlik kompaniyasi va “Km/ch” avtosalonlar tarmog‘i sobiq egasi Tohir Jalilovni bankrot deb tan oldi. Bu haqda Kommersant xabar berdi.

Sud Jalilovga nisbatan qarzlarni qayta taqsimlash jarayonini joriy qilgan. Uning moliyaviy boshqaruvchisi etib “Razvitiye” tashkilotidan Kristina Tutova tasdiqlangan. Tadbirkorning bankrotligi yakunlarini sud 2020-yilning 18-mayida bo‘lib o‘tadigan majlisda ko‘rib chiqadi.

Tohir Jalilovni bankrot deb tan olishni “Vozrojdeniye” banki 502,99 million rubl (taxminan 7,8 million dollar) miqdoridagi qarz sababli talab qilgan. Bankrotlik bo‘yicha shikoyat 2019-yilning mart oyida taqdim etilgan.

“Km/ch” avtosalonlarining moliyaviy muammolari 2016-yilda ma’lum bo‘lgan. O‘shanda avtosalonlarning yuridik shaxslari ustidan “Insvesttorgbank” va “Vozrojdeniye” banki tomonidan arizalar berilgan.

Avtosalonlar Uz-Daewoo, Ravon, Iveco, ZAZ, Skoda va Volkswagen avtomobillarini sotgan. Barcha salonlar 2014-yilda olingan kreditlar bo‘yicha o‘zaro kafil bo‘lgan, tarmoq asosiy yuridik shaxslarining Rossiyadagi qarzi 20 milliard rubldan (taxminan 313 million dollar) oshishi mumkin.

“O‘zbekoziqovqatxolding” kompaniyasi saytidagi ma’lumotlarga ko‘ra, Tohir Jalilov 1990-yillarda “UzDEUavto” kompaniyasida ishlagan, shu jumladan 2003-yilgacha kompaniyani boshqargan.

Spot’ning qo‘shimcha qilishicha, Keyin esa “UzDEUavto Saratov” yopiq aksiyadorlik jamiyatining bosh direktori etib tayinlangan. Bir vaqtning o‘zida, 2004—2006-yillarda Kiyevda “Ukr-Uzavro” MChJ bosh direktori vazifasini bajaruvchi bo‘lgan. 2007—2009-yillarda o‘rindoshlik asosida “UzavtoRus” MChJ direktori vazifasini bajaruvchi lavozimida ham ishlagan.

2009—2010-yillarda Tohir Jalilov General Motors Uzbekistan’ning marketing, savdo va xizmat ko‘rsatish bo‘yicha boshqaruvchi direktori lavozimida ishlagan. 2010—2017-yillarda u “O‘zavtosanoat” AJ raisi o‘rinbosari, bir vaqtning o‘zida GM Uzbekistan bosh direktori lavozimi egallagan. 2017-yildan buyon Tohir Jalilov “O‘zbekoziqovqatxolding” kompaniyasiga rahbarlik qilmoqda.