Facebook’dagi “Kurbanoff.Net” sahifasida A-76 markali benzinning o‘rnini egallagan AI-80 markali benzin qaysi Yevro standartga mos ekanligi masalasi ko‘tarilgan. Shuningdek, bloger bu turdagi benzin O‘zbekistonda qanday ishlab chiqarilishiga ham qiziqqan. “O‘zbekneftgaz” aksiyadorlik jamiyati matbuot xizmati mazkur savollarga javob berdi.
Ma’lum qilinishicha, ayni paytda mamlakatdagi neftni qayta ishlash zavodlarining texnologik jarayonlari Yevro 2 standartining xalqaro talablariga muvofiq avtomobil benzinini ishlab chiqarishga imkon beradi. A-76 markali benzinning o‘rniga ishlab chiqarilayotgan AI-80 markali benzin Yevro 2 standartining xalqaro talablariga mos keladi.
Yevro standartining ekologik talablari oltingugurtning massa ulushi, aromatik uglevodorodlarning tarkibi, benzol tarkibi, olefin uglevodorodlari tarkibi kabi ko‘rsatkichlar bilan farq qiladi.
Yevro 4 va 5 talablariga mos benzin ishlab chiqarish uchun respublikaning neftni qayta ishlash zavodlarini modernizatsiya qilish, xususan, yangilarini qurish va mavjud texnologik qurilmalarni qayta ta’mirlash talab qilinadi.
Qayd etilishicha, “O‘zbekneftgaz” AJ tomonidan Buxoro neftni qayta ishlash zavodini modernizatsiya va rekonstruksiya qilish bo‘yicha investitsion loyiha amalga oshirilmoqda. Loyiha amalga oshirilgach, Yevro 4 va 5 talablariga javob beradigan avtobenzin ishlab chiqarish ta’minlanadi.
Izoh (0)