Россиянинг Воронеж вилояти арбитраж суди GM Uzbekistan’нинг собиқ бош директори, Воронеждаги Uz-Daewoo дилерлик компанияси ва «Км/ч» автосалонлар тармоғи собиқ эгаси Тоҳир Жалиловни банкрот деб тан олди. Бу ҳақда Коммерсант хабар берди.
Суд Жалиловга нисбатан қарзларни қайта тақсимлаш жараёнини жорий қилган. Унинг молиявий бошқарувчиси этиб «Развитие» ташкилотидан Кристина Тутова тасдиқланган. Тадбиркорнинг банкротлиги якунларини суд 2020 йилнинг 18 майида бўлиб ўтадиган мажлисда кўриб чиқади.
Тоҳир Жалиловни банкрот деб тан олишни «Возрождение» банки 502,99 миллион рубл (тахминан 7,8 миллион доллар) миқдоридаги қарз сабабли талаб қилган. Банкротлик бўйича шикоят 2019 йилнинг март ойида тақдим этилган.
«Км/ч» автосалонларининг молиявий муаммолари 2016 йилда маълум бўлган. Ўшанда автосалонларнинг юридик шахслари устидан «Инсвестторгбанк» ва «Возрождение» банки томонидан аризалар берилган.
Автосалонлар Uz-Daewoo, Ravon, Iveco, ZAZ, Skoda ва Volkswagen автомобилларини сотган. Барча салонлар 2014 йилда олинган кредитлар бўйича ўзаро кафил бўлган, тармоқ асосий юридик шахсларининг Россиядаги қарзи 20 миллиард рублдан (тахминан 313 миллион доллар) ошиши мумкин.
«Ўзбекозиқовқатхолдинг» компанияси сайтидаги маълумотларга кўра, Тоҳир Жалилов 1990 йилларда «УзДЭУавто» компаниясида ишлаган, шу жумладан 2003 йилгача компанияни бошқарган.
Spot’нинг қўшимча қилишича, Кейин эса «УзДЭУавто Саратов» ёпиқ акциядорлик жамиятининг бош директори этиб тайинланган. Бир вақтнинг ўзида, 2004—2006 йилларда Киевда «Укр-Узавро» МЧЖ бош директори вазифасини бажарувчи бўлган. 2007—2009 йилларда ўриндошлик асосида «УзавтоРус» МЧЖ директори вазифасини бажарувчи лавозимида ҳам ишлаган.
2009—2010 йилларда Тоҳир Жалилов General Motors Uzbekistan’нинг маркетинг, савдо ва хизмат кўрсатиш бўйича бошқарувчи директори лавозимида ишлаган. 2010—2017 йилларда у «Ўзавтосаноат» АЖ раиси ўринбосари, бир вақтнинг ўзида GM Узбекистан бош директори лавозими эгаллаган. 2017 йилдан буён Тоҳир Жалилов «Ўзбекозиқовқатхолдинг» компаниясига раҳбарлик қилмоқда.
Изоҳ (0)