Oliy sud matbuot xizmati O‘zA saytida e’lon qilingan “Aybsiz holiga 7 yil-u 100 kundan buyon qamoqdaman...” sarlavhali maktubga munosabat bildirdi. Unda “Namangan suv trans” MChJ sobiq rahbari Jobir Obidov soxta ayblovlar bilan 17 yil muddatga qamalganidan shikoyat qilgan.
Munosabatda keltirilishicha, 2013-yil 18-yanvardagi jinoyat ishlari bo‘yicha Kosonsoy tuman sudi hukmiga ko‘ra, Jobir Obidov Jinoyat kodeksining 164-moddasi (bosqinchilik) 4-qismi “a”, “v” bandlari, 165-moddasi (tovlamachilik) 3-qismi “a”, “b” bandlari, 189-moddasi (savdo yoki xizmat ko‘rsatish qoidalarini buzish) 3-qismi, 209-moddasi (mansab soxtakorligi) 2-qismi “a”, “b” bandlari, 227-moddasi (hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirish) 1-qismi va 229-moddasida (o‘zboshimchalik) nazarda tutilgan jinoyatlarni sodir etganlikda aybdor deb topilgan.
Unga nisbatan 3 yil muddatga mansabdorlik va moddiy javobgarlik lavozimlarida ishlash huquqidan mahrum qilingan holda eng kam oylik ish haqining 410 baravari miqdorida, ya’ni 25 797 200 so‘m jarima hamda 17 yil muddatga ozodlikdan mahrum qilish jazolari tayinlangan.
Shuningdek, sudlanuvchi J. Obidovga nisbatan Oliy Majlis Senatining 2012-yil 5-dekabrdagi “O‘zbekiston Respublikasi Konstitutsiyasi qabul qilinganligining yigirma yilligi munosabati bilan amnistiya to‘g‘risida”gi qarorining 7-bandi “b” kichik bandi tatbiq etilib, tayinlangan ozodlikdan mahrum qilish jazosining o‘talmagan muddati to‘rtdan bir qismiga qisqartirilgan.
Jinoyat ishlari bo‘yicha Namangan viloyat sudi apellyatsiya instansiyasining 2013-yil 15-martdagi ajrimi bilan J. Obidovga nisbatan chiqarilgan sud hukmi o‘zgartirilib, unga tayinlangan jazoning o‘talmagan qismini amnistiya to‘g‘risidagi qarorning 7-bandi “b” kichik bandiga asosan to‘rtdan bir qismiga qisqartirish qismi bekor qilingan.
Sud hukmining qolgan qismi o‘zgarishsiz qoldirilgan.
“Ma’lum qilinadiki, fuqaro J. Obidov tomonidan Oliy sudga nazorat tartibida shikoyat berilgan. Biroq unga oid jinoyat ishi Bosh prokuraturaga ham keltirgan nazorat tartibidagi shikoyati bilan birga o‘rganilayotganligi sababli uning Oliy sudga yozgan shikoyati qo‘shib o‘rganish uchun Bosh prokuraturaga yuborilgan”, — deyiladi matbuot xizmati xabarida.
Izoh (0)