“Kun.uz” 19-noyabr kuni Toshkent shahar hokimi Jahongir Ortiqxo‘jayev ovozi yozilgan audioning 14 daqiqadan ortiq davom etadigan talqinini e’lon qilgan edi, hozir o‘sha audio o‘rniga 17 daqiqadan ko‘proq davom etadigani qo‘yilgan. Unda, jumladan, sayt ishchilarining ikki-uch kunga besabab yo‘qolib qolishi oqibatlari va Olmazor tumani hokimi sobiq o‘rinbosari Abdurasul Vahobovni oxirigacha, kerak bo‘lsa, Ortiqxo‘jayevning o‘zi ishdan olib tashlangunicha himoya qilishi haqidagi ta’kidlar bor. “Kun.uz”ning qo‘shimcha qilishicha, suhbat aslida bir soatga yaqin davom etgan.
Dehqonoboddagi 43 yildan buyon elektr tokisiz faoliyat yuritgan maktabga elektr ta’minoti o‘tkazildi. “Daryo”da e’lon qilingan maqoladan so‘ng. “Hududiy elektr tarmoqlari” kompaniyasi bosh-qoshligida. Kompaniya qilingan ish haqida hisobot beribdi-yu (elektr ulab berishgani uchun rahmat, aytmoqchi), lekin keyin pand-nasihatga ham o‘tib ketganmiye: “Nima uchun mahalliy hokimlik vakillari yoki xalq ta’limi boshqarmasi qariyb yarim asr elektr energiyasiz faoliyat yuritgan maktabdagi bu vaziyatga e’tibor qaratmadi?”.
O‘zbekistonga import qilinadigan Chevrolet Trailblazer’ning dastlabki suratlari paydo bo‘ldi. Ushbu avtomobil O‘zbekiston uchun Tailandda ishlab chiqarilgan va eng qimmat versiyasi 38 ming dollardan sotilishi kutilmoqda. Bloger Malik Karimovning qo‘shimcha qilishicha, UzAuto Motors nafaqat avval e’lon qilingan Equinox, Trailblazer, Traverse modellarini, balki Chevrolet Tahoe’ni ham sotar emish.
Yana qanday yangiliklar? O‘zbekiston Markaziy banki 2020-yildan inflyatsion targetlash rejimiga o‘tishni boshlaydi. Obeliks roli bilan tanilgan fransuz aktyori Jerar Depardye Qoraqalpog‘istonga yetib keldi. Navoiyda 9400 dollar pora olgan maktab direktori qo‘lga olindi. Urganchdagi O‘zbekiston bayrog‘i dunyoda balandligi bo‘yicha 15-o‘rinni egalladi. Rossiyaliklarning O‘zbekistondagi xarajatlari bir yil ichida 50 million dollarga o‘sdi. Buxoro, Samarqand va Navoiy viloyatlarida shamoldan energiya oluvchi qurilmalar o‘rnatiladi. Eronda benzin narxi oshishiga qarshi norozilik namoyishlari davomida 100 dan ortiq odam halok bo‘ldi. Ukraina rasmiylari amerikalik podpolkovnikka mamlakat mudofaa vaziri lavozimini taklif qilgani ma’lum qilindi.
Izoh (0)