Xorazm viloyati IIB va DXX xodimlari tomonidan hamkorlikda o‘tkazilgan tezkor tadbir natijasida respublika hududida Tojikiston fuqarolarining jinoiy faoliyatiga chek qo‘yildi. Bu haqda IIV huzuridagi Tergov departamenti xabar bermoqda.
Tojikistonlik 34 yoshli I.U. va 36 yoshli K.D. oldindan jinoiy til biriktirib, K.D. boshqaruvidagi “Vaz-2110” rusumli avtomashina benzin baki ichiga yashirgan holda Tojikistondan O‘zbekiston hududiga chegara posti orqali kontrabanda yo‘li bilan olib kirilgan 6 dona polietilen paketga qadoqlangan opiy giyohvandlik vositasini 2019-yil 5 iyun kuni Samarqand viloyatida 20 ming AQSh dollariga sotayotganida ushlangan.
Mazkur holat yuzasidan Xorazm viloyat IIB huzuridagi Tergov boshqarmasi tomonidan Jinoyat kodeksining 273-moddasi 5-qismi (juda ko‘p miqdorda giyohvandlik vositalarini qonunga xilof ravishda sotish) va JKning 246-moddasi 2-qismi (kontrabanda) bilan jinoyat ishi qo‘zg‘atilgan.
Dastlabki tergov jarayonida Tojikiston fuqarolariga nisbatan yuqoridagi moddalar bilan ayblov e’lon qilingan hamda qamoqqa olish tarzidagi ehtiyot chorasi qo‘llangan.
2019-yil 5-noyabr kuni Jinoyat ishlari bo‘yicha Urganch tuman sudi hukmiga ko‘ra K.D. va I.U. aybdor deb topilib, ularga tegishli ravishda 10 va 12 yil muddatga ozodlikdan mahrum qilish jazosi tayinlandi.
Izoh (0)