O‘t o‘chirish, tez yordam va ichki ishlar organlari xizmat mashinalari chaqiruv bo‘yicha ketayotgan vaqtda, ularning o‘tib ketishiga xalaqit bergan haydovchilarga solinadigan jarima miqdorini oshirish rejalashtirilmoqda. Bu o‘zgarish muhokama uchun e’lon qilingan “O‘zbekiston Respublikasi Ma’muriy javobgarlik to‘g‘risidagi kodeksining 128.5-moddasiga o‘zgartish kiritish haqida”gi qonun loyihasida ko‘zda tutilgan.
Qonun loyihasiga ko‘ra, ushbu modda birinchi qismining sanksiyasidagi “besh” so‘zi “o‘n” so‘zi bilan almashtiriladi.
128.5-moddaning amaldagi birinchi qismiga muvofiq, “Transport vositalari haydovchilarining to‘sqinliksiz harakat qilish huquqidan foydalanadigan transport vositalarining o‘tib ketishiga xalaqit berishi — eng kam ish haqining besh baravari miqdorida jarima solishga sabab bo‘ladi”.
Qonun loyihasida nazarda tutilgan o‘zgartirish qabul qilinsa, mazkur jarima miqdori eng kam ish haqining o‘n baravari miqdorida belgilanadi.
Ushbu huquqbuzarlikni ma’muriy jazo qo‘llanilganidan keyin bir yil davomida takror sodir etish eng kam ish haqining yigirma baravari miqdorida jarima solishga yoki transport vositasini boshqarish huquqidan bir yil muddatga mahrum etishga sabab bo‘ladi.
Izoh (0)