Bugun, 15-noyabr kuni, Markaziy saylov komissiyasi Oliy Majlis Qonunchilik palatasi deputatligiga partiyalardan ko‘rsatilgan nomzodlarni rasman ro‘yxatga oldi. Bu haqda Qonunchilik palatasi saylovlarini yoritish bo‘yicha Xalqaro matbuot markazi xabar berdi.
Nomzodlar qo‘yilgan saylov okruglari soni 750 tani tashkil etadi. Qonunchilik palatasi deputatligiga yangidan nomzod etib qo‘yilganlar sonida 440 nafarini erkak (58,7 foiz) va 310 nafari ayoldir (41,3 foiz). Deputatlikka qaytadan nomzod etib qo‘yilganlar soni - 37 nafari erkak (4,9 foiz), 6 nafari ayol (0,8 foiz).
Shuningdek, deputatlikka nomzodlarning eng ko‘pi pedagog mutaxassisligiga ega - 223 nafar. Iqtisodchi 143 nafar, shifokor 93 nafarga teng. Keyingi o‘rinlardan muhandis (65), huquqshunos (52), agronom (30), jurnalist (24), tadbirkor (18), faylasuf (8), siyosatshunos (3) va boshqalar (91) joy oldi.
Bundan tashqari, nomzodlarning 687 nafari o‘zbek, 25 nafari qoraqalpoq, 13 nafari tojik, 7 nafari rus, 6 nafari qozoq, 4 nafari koreys, 3 nafari qirg‘iz, 2 nafari tatar va 3 nafari boshqa millat vakillaridir.
Nomzodlar orasida 22 nafar fan doktori bor. Fan nomzodiga ega bo‘lgan nomzodlar soni 52 nafarga teng, oliy ma’lumotlilar soni - 750 nafar.
Qonunchilik palatasi deputatligiga nomzodlarning 341 nafari (45,5 foiz) 41-50 yoshdagilar bo‘lsa, 227 nafari (30,3 foiz) - 31-40 yoshdagilar, 156 nafari (20,8 foiz) 51-60 yoshdagilar, 14 nafari (1,9 foiz) 25-30 yoshdagilar hamda 12 nafari (1,6 foiz) 60 yoshdan kattalardir.
Izoh (0)