Axborot va ommaviy kommunikatsiyalar agentligida 12-noyabr kuni Advokatlar palatasi va Adliya vazirligi vakillari bilan matbuot anjumani bo‘lib o‘tdi.
O‘zAning xabar berishicha, anjumanda 2018-yil 12-mayda qabul qilingan “Advokatura instituti samaradorligini tubdan oshirish va advokatlarning mustaqilligini kengaytirish chora-tadbirlari to‘g‘risida”gi Prezident farmoni ijrosi yuzasidan o‘tgan davr mobaynida amalga oshirilgan ishlar tahlil qilindi.
Qayd etilishicha, tergov hibsxonalari va yopiq turdagi muassasalarda advokatlar va himoya ostidagi shaxslar uchrashuvi uchun audio va videokuzatuv qurilmalari bo‘lmagan 69 ta xona qayta jihozlanib, ularda vizual ko‘rib turish imkoniyati yaratildi.
Shuningdek, advokatlik litsenziyasini berish va advokatlik tuzilmalarini davlat ro‘yxatidan o‘tkazish tartibi sezilarli darajada soddalashtirildi. Advokatlik litsenziyasining amal qilishini to‘xtatib turish va tugatish sud tomonidan amalga oshirilishi belgilandi.
Natijada advokatlarning litsenziyasini tugatish joriy yilning birinchi yarmida o‘tgan yilning shu davriga nisbatan 2,3 baravarga (13 nafar) kamaydi. Advokatlarning sud binosida kompyuter, mobil va boshqa aloqa vositalaridan hech bir moneliksiz foydalanishi yo‘lga qo‘yildi.
Tadbirda O‘zbekistonda nima sababdan advokatlar soni kamligi, soha bo‘yicha mutaxassislarning yetishmasligi borasidagi savolga Advokatlar palatasi raisi birinchi o‘rinbosari Shuhrat Sodiqov javob berdi.
“Qonunchiligimiz bo‘yicha advokat bo‘lish uchun talabgor 2 yillik yuridik tajribaga ega bo‘lishi kerak. Biz sohaga yoshlarni jalb qila olmayapmiz. Hozirda 4 ming advokat orasida 70 nafargina 30 yoshgacha bo‘lgani bor. Talabalar bilan yaqindan ishlayapmiz, lekin ularni kasbimizga olib kirishda 2 yillik tajriba degan joyi bor va biz 2 yilni yo‘qotyapmiz. Talabgor yo chet elga o‘qish yoki ishga ketib qoladi, yo boshqa ish topib ketadi. Advokatlar palatasi huzurida talabalar uchun klub ochganmiz. Kuni kecha undagi Toshkent davlat yuridik universitetining 15 nafari advokat bo‘laman deyapti, lekin ular ertaga 2 yil senga ish bera olmayman deganimizdan keyin uni boshqa ish beruvchi olib ketadi. Shu tariqa yosh kadrlarni ham yo‘qotyapmiz. Yangi qonunda bu to‘siqni olib tashlaymiz va kelajakda umid qilamizki advokatlar soni ortadi”, — degan u.
Ma’lumot uchun, O‘zbekistonda 1 ta advokat 8 250 nafar fuqaroga to‘g‘ri keladi. Bu ko‘rsatkich AQShda 256 nafar, Italiyada 260 nafar, Germaniyada 500 nafar, Ozarbayjonda 667 nafar, Gollandiyada 900 nafar, Fransiyada 1 403 nafar, Qozog‘istonda 4 000 nafar fuqaroga to‘g‘ri keladi.
Izoh (0)