Telba va o‘lmas gangster laqablari bilan tanilgan Fransiyaning Marsel shahrining “qonundagi o‘g‘risi” 89 yoshli Jak Ember vafot etdi. Bu haqda “RIA Novosti” xabar berdi.
Gangsterning rafiqasi Kristin Ember erining Eks-an-Provans kommunasi shifoxonasida vafot etganini tasdiqlagan.
Jak Le-Mat, ya’ni “Telba” laqabini olgan Ember 1960—1970-yillarda Fransiyaning kriminal markazlaridan biri bo‘lgan Marsel shahridagi bandalardan biriga rahbarlik qilgan.
“Telba” laqabi Emberga uning qarzdorlardan pul undirishdagi uslubi sabab berilgan. Uchuvchi litsenziyasiga ega Ember qarzdorni samolyotga o‘tkizib, yetarli balandlikka chiqqandan keyin dvigatelni o‘chirib qo‘ygan. Samolyot erkin tushish tezligida qulayotgan vaqtda ushbu tahdiddan qo‘rqqan qarzdor barcha pullarni to‘lab berishga rozi bo‘lgan.
1977-yilda Emberga suiqasd uyushtirilgan va u 20 ta joyidan yaralanib, yakunda omon qolgandi. Ushbu voqea asosida 2010-yilda bosh rolni Jan Reno ijro etgan “O‘lmas: 22 ta o‘q” filmi suratga olingan.
Marsel jinoyat olami afsonasi bo‘lgan Ember umrining so‘nggi yillarida kriminal ishlardan uzoqlashgan va asosiy e’tiborini ot poygalari hamda shou-biznesga qaratgandi. Uning mashhur aktyor Alen Delon bilan birgalikda poyga otlari uchun otxonaga egalik qilgani ma’lum.
Izoh (0)