Ижтимоий тармоқларда Бухоро вилоятида пахта терими билан боғлиқ икки ЙТҲ содир бўлгани ҳақида тарқалган хабарлар юзасидан Бухоро вилоят ИИБ муносабат билдирди. Тарқалган хабарларда Бухорода зобит машинасида ёниб кетгани, ҳашарчи тўла автобус зовурга ағдарилгани айтилган.
Бухоро вилоят ИИБ матбуот хизматига кўра, 29 октябрь куни соат 21:00 да йўл транспорт ҳодисаси содир бўлиб, ички ишлар ходими воқеа жойида вафот этган.
Маълумотга кўра, 1985 йилда туғилган майор Шоҳидбек Жумаев Олот туман ИИБ ЖҚБ тезкор вакили лавозимида ишлаган. У шу куни ИИБ раҳбариятидан рухсат олиб, яшаш уйига қайтаётиб, ўзининг бошқарувидаги Nexia-3 русумли, автомашинасида М-37-йўлининг «Қоракўл—Бухоро» йўналишида ҳаракатланган.
Кечки пайт, йўл қоронғулигида йўлнинг 295-километрига етганида, шу йўлдан ҳаракатланиб бораётган Жондор тумани «Хумин» МФЙда яшовчи, фермер хўжалиги тракторчиси, 1988 йилда туғилган Илёс Раҳматов бошқарувидаги «ТТЗ-80.10» маркали тракторнинг тиркамасига орқа томондан келиб кучли зарб билан урилган. Оқибатда Nexia-3 автомашинасида ёнғин келиб чиққан ва ҳайдовчи Шоҳидбек Жумаев воқеа жойида вафот этган.
«Мазкур ҳолат юзасидан Жиноят Кодексининг 266-моддаси, 2-қисми билан жиноят иши қўзғатилиб, йўл транспорт ҳодисасининг келиб чиқиш сабабларини аниқлаш бўйича экспертизалар тайинланди. Ҳозирда Жондор тумани прокуратураси томонидан тергов ҳаракатлари ва вилоят ИИБ томонидан хизмат текшируви ўтказилмоқда», — деди «Дарё»га вилоят ИИБ матбуот хизмати раҳбари Қувват Ярашов.
Кейинги автотранспорт ҳодисаси эса 28 октябрь куни соат 18:50 да Жондор тумани 4Р 225-сонли йўлнинг «Чорзона—Мохонкўл» йўналиши 2-километрида содир бўлган. Matiz автомашинаси эгаси Мадамин Тўхтаев йўл ҳаракати қоидаларининг бузиб, қарама-қарши йўналишда ҳаракатланган. Оқибатда фуқаро Тўхта Ширинов бошқарувидаги «ПАЗ 672м» русумли автобус йўналишига чиқиб, ЙТҲ содир бўлишида сабабчи бўлган.
«Натижада Matiz автомашинаси ҳайдовчиси, Жондор туманидаги фермер хўжалиги раҳбари Мадамин Тўхтевнинг ўзи енгил тан жароҳати олган ва туман касалхонасига мурожаат қилган. Ҳозирда касалхонадан чиққан, аҳволи қониқарли. Бироқ, ижтимоий тармоқларда ёритилганидек, фуқаро бошқарувидаги автобус олд қисми билан зовурга кириб қолган, аммо, ағдарилмаган. Шунингдек, мазкур йўловчитранс автобус ҳеч қандай пахта ҳашарчиларини ташиш хизматига жалб қилинмаган. Ваҳоланки, автобусда ҳайдовчидан бошқа ҳеч ким бўлмаган ва ҳайдовчи тан жароҳати олмаган. Автомашина эгалари томонидан содир бўлган икки автоҳалокат ҳам пахта терими билан боғлиқ эмас. Бу ҳолатларга ойдинлик киритилди», — дейди Бухоро вилояти ИИБ матбуот хизмати бошлиғи Қувват Ярашов.
Мазкур ҳолат юзасидан Жондор тумани ИИБ ҳузуридаги Тергов гуруҳи томонидан терговга қадар текширув ҳаракатлари олиб борилиб, Matiz ҳайдовчиси Мадамин Тўхтевга нисбатан Маъмурий жавобгарлик тўғрисидаги кодекснинг 133-моддаси билан тўпланган ҳужжатлар қонуний чора кўриш учун Жондор туман Маъмурий судига тақдим этилган.
Изоҳ (0)