Farg‘onaning Quva tumanida 2 yigitni yarashtirgani kelgan tanishlarining o‘zi janjallashib, voqea pichoqbozlik bilan yakunlandi. Bu haqda “Daryo”ga Bosh prokuratura matbuot xizmati ma’lum qildi.
Aniqlanishicha, 1-noyabr, juma kuni soat 20:0 larda F.T. tanishi M.N. bilan o‘zaro janjallashgan. Janjal davomida M.N. uni urib-do‘pposlagan. F.T. bu haqda tanishi J.S.ga aytgan. J.S. esa do‘pposlagan M.N.ning tanishi J.Yu.ga telefon qilib, ularni “Xonobod” MFY hududidagi “Qosim Karvon” fermer xo‘jaligi dala maydoni hududiga chaqirgan va janjallashganlarni o‘zaro yarashtirib qo‘yishni taklif qilgan.
J.Yu. tanishlari J.B., M.N., J.M. bilan birga kelishilgan joyga 2-noyabr, shanba kuni soat 02:10 larda borgan.
U yerda o‘zaro suhbat davomida J.S. J.M. bilan janjallashib qolgan va uni ikkala oyoq-son qismlariga, yelka sohasi, qo‘llarining ikkala bilak hamda chap biqin sohasiga pichoq bilan urib, tan jarohati yetkazgan.
Shundan so‘ng pichoqlagan J.S. yo‘lovchi mashinani to‘xtatib, jarohatlangan J.M.ni shifoxonaga jo‘natgan. Ammo u ko‘rsatilgan tibbiy muolajalarga qaramay, 2-noyabr kuni soat 03:05 larda shifoxonada vafot etgan.
Holat yuzasidan 2-noyabr kuni tuman IIB huzuridagi tergov boshqarmasi tomonidan J.S.ga nisbatan Jinoyat kodeksining 104-moddasi 3-qismi “d” bandi (Qasddan badanga og‘ir shikast yetkazish oqibatida odam o‘lishi) bilan jinoyat ishi qo‘zg‘atilgan. Ushbu moddada 8 yildan 10 yilgacha ozodlikdan mahrum qilish jazosi ko‘zda tutilgan.
Hozirda ushbu shaxs qo‘lga olingan bo‘lib, jinoyat ishi tergovi ustidan Farg‘ona viloyat prokuraturasi tomonidan nazorat o‘rnatilgan.
Izoh (0)