Фарғонанинг Қува туманида 2 йигитни яраштиргани келган танишларининг ўзи жанжаллашиб, воқеа пичоқбозлик билан якунланди. Бу ҳақда «Дарё»га Бош прокуратура матбуот хизмати маълум қилди.
Аниқланишича, 1 ноябрь, жума куни соат 20:0 ларда Ф.Т. таниши М.Н. билан ўзаро жанжаллашган. Жанжал давомида М.Н. уни уриб-дўппослаган. Ф.Т. бу ҳақда таниши Ж.С.га айтган. Ж.С. эса дўппослаган М.Н.нинг таниши Ж.Ю.га телефон қилиб, уларни «Хонобод» МФЙ ҳудудидаги «Қосим Карвон» фермер хўжалиги дала майдони ҳудудига чақирган ва жанжаллашганларни ўзаро яраштириб қўйишни таклиф қилган.
Ж.Ю. танишлари Ж.Б., М.Н., Ж.М. билан бирга келишилган жойга 2 ноябрь, шанба куни соат 02:10 ларда борган.
У ерда ўзаро суҳбат давомида Ж.С. Ж.М. билан жанжаллашиб қолган ва уни иккала оёқ-сон қисмларига, елка соҳаси, қўлларининг иккала билак ҳамда чап биқин соҳасига пичоқ билан уриб, тан жароҳати етказган.
Шундан сўнг пичоқлаган Ж.С. йўловчи машинани тўхтатиб, жароҳатланган Ж.М.ни шифохонага жўнатган. Аммо у кўрсатилган тиббий муолажаларга қарамай, 2 ноябрь куни соат 03:05 ларда шифохонада вафот этган.
Ҳолат юзасидан 2 ноябрь куни туман ИИБ ҳузуридаги тергов бошқармаси томонидан Ж.С.га нисбатан Жиноят кодексининг 104-моддаси 3-қисми «д» банди (Қасддан баданга оғир шикаст етказиш оқибатида одам ўлиши) билан жиноят иши қўзғатилган. Ушбу моддада 8 йилдан 10 йилгача озодликдан маҳрум қилиш жазоси кўзда тутилган.
Ҳозирда ушбу шахс қўлга олинган бўлиб, жиноят иши тергови устидан Фарғона вилоят прокуратураси томонидан назорат ўрнатилган.
Изоҳ (0)